Wezîrê Karanê Zereyî yê Tirkîya bi vatişê 'FETOgîr û terorîst' pê Selahattîn Demîrtaş û Wekîl Omer Faruk Gergerlîogluyî heqaret kerdbi û ê sey hedef mojnaybî. 

Heyetê Rayberdişî yê Merkezê HDPyî vera qalanê Soyluyî bi eşkerayîyêka nuştekîye nêrazîbîyayîşê xo mojna.

HDPyî ard ziwan ke ê rîyo roşnî yê welatî yê la Soylu rîyo tarî yo. HDPyî pare kerd ke her heqaretê Soyluyî heman wextî de vera şarî ameyo kerdene, îtîrafê sûcanê ci yo û rojêke do bêro ercnayene. 

Eşkerayîya HDPyî wina dewam kena: '' Suleyman Soyluyî derheqê qerarê Mehkemeya Heqanê Merdiman a Ewropa (MHME) yê  wa Selahattîn Demîrtaş cade bêro verdayene de vat ''Demîrtaş terorîst o coka ey qerarê MHME qebul nêkenê.'' Selahattîn Demîrtaş hetê îqtîdarî ra rehîn ame girewtene û o ewladê nê şarî yo. Embazanê ma yê sey ey têkoşînê azadî, haştî û têdûştîye de bedelê giranî dayî. Sûcdarîya 'terorîstîye' bêhedîye û bêşermîye ya.   

Embazê ma Omer Faruk Gergerlîoglu hende pawitoxo rûmetên ê heqanê merdiman o ke eke siba Soylu mexdûr bibo eşkeno heqê ci bipawo. Gergerlîogluyî seba ke vato 'qral zit o' Îqtîdar sey her wextî bi rayîrê Soyluyî hêrişê ey kerd. Êyê ke bi serran o kişta tarîqat û cemaatan de rayra şînê, nêeşkenê Gergerlîogluyî rê vajê FETOgîr. Na bêhedîye û zûrkerîye ya.''