Endama MYKyê KESKî Elîfe Çuhadar derheqê buçeya 2021î ke Heyetê Pêroyî yê Meclîsî de bi 316 ya, 193 red rayan ameye qebulkerdene de  qisey kerd.

Çuhadare bale ante ser ke na butçe ya şarî nê ya serekkomarî ya û ard ziwan ke yewmîya tewr kême ya 2 hezar 792. 10 lîra ke TUÎKî eşkera kerde keyeyêk nêeşekno pê îdareyê xo bikero. Çuhadare vat: ''Heta ke karker û kedkarî waştişanê xo yew mekerê û pîya mudaxaleyê prosesî mekerdê zextê vera înan do bizêdîyo. Ganî mucadeleyo rêxistinkerde zafêr bo. Butçeya ke bi bacî yena raameye sermayedaran rê yena peşkeşkerdene. Îqtîdar xora hetê înan de yo. Butçe de cayê kedkaran çîn o. Yew welato ke bêkarîye û feqîrîye wina bîya zaf de butçeya ka ameya amadekerdene butçeya ma nîya. Doneyê TUÎKî binê sînorê vêşanîye de yê. Xora kedkar û karkerî zanê ke pêvînayîşanê butçe ra tiway nêvejîyeno.''

Elîfe Çuhadar wina dewam kerd: ''Çi heyf ke Turk-Îşo ke bi nameyê karkerdan tewrê pêvînayîşan bi eşkera nêkerd ke kedkaran senî yew yewmîya bewlî kerda û waşt ke verî wa patronî hûmare bewlî bikerê. Ma nê tewirê înan raşt nêvînenî. Ganî kedkar û karkerî nayî bewlî bikerê. Çi heyf ke sendîkayê karkeran mucadele,  xêristinbîyayîş û waştişan zehîf kenê. Karker û kedkaran waşt  ke yewmîya tewr kême wa sewîya sey merdim/e ciwîyayîşî de bo û înan ra bac nêro girewtene. Na yewmîya goreyê kesêkî/e yena amadekerdene la pê nayî keyeyêk îdareyê xo keno.''

Çuhadare ard ziwan ke do serra 2021î hetê karker û kedkaran dahîna zaf çetîn bo û vat: ''Rejîmê yew merdimî bi qanûnanê ke yenê vetene, binpaykerdişê huqûqî û polîtîkayanê zextî prosesê ronayîşê faşîzmî mûneno. Krîzê ekonîmî pê pandemî xorîyêr bi.Têna bi mucadeleyê rêxistinkerdeyî yê karker û kedkaran ma eşkenê na tengayî ra vejîyê. Heta ke heme sendîkayî, karker û kedkarî pêro pîya rêxistinkerde mucadele nêkerê verê hêriş û zextan nîno girewtene.''