Vera pêkerdişê Şingalî ke mabênê hukmatê Iraqî û PDKyî de ame îmzakerdene nêazîbîyayîşî dewam kenê. Wekîla HDPyî ya Êlihî Feleknaze Uca sebep û netîceyê pêkedişî ercnayî.

Uca vist vîrî ke êzidîyî bi serran o raştê fermanan yenê û vat: ''No pêkerdiş zî do verê fermananê neweyan abikero. Verê çimanê dinya de 2014 de şarê êzidîyan raştê qirkerdişî ame. Heme dinya têna seyr ked. Bi sehezaran êzdiyî erdê xo de bîyî macîr û bi seyan zî vêşanîye û têşanîye ra merdî. Bado ke ciwananê kurdan korîdor akerd nizdê 150 hezar êzidîyan verê xo koyê Şingalî. O wext çewî/e êzidîyan rê hetkarî nêkerd. Badê fermanî Şingal de cuya newî ameye ronayene. Şarê êzidî xoserîya xo îlan kerde. Meclîsê xo ronayî û hêzê xo yê pawitişî nayî ro. Cinîyê ke çeteyan ra xelisîyayî YPJî de ca girewt.''

Uca bale ante ser ke hêzanê YBŞ û YJŞyî semedê pawitişê Şingalî bedelê pîlî dayî û vat: ''Ewro bê îradeyê şarê Şingalî derheqê Şingalî de qeraran  genê û îmzayan erzenê. Bi nê pêkerdişî wazenê Şingalî bikerê veng. Qerar û pêkerdişê derheqê Şingalî de sîyasî yê. Konseptê Şingalî cehdkerdişê verakerdişê hêrişê Amerîka yê vera Îranî yo. Wazenê ke Şingal bikerê veng ke rayîrê Bexdadî xetêke abikerê. No pêkerdiş têna mabênê Bexdad û PDKyî de nê mabênê Bexdad, PDK û Amerîka de ame kerdene. Başûrê Kurdîstanî de bê PDKyî heme partî û dezgehî vera nê pêkerdişî yê.''

Feleknaze Uca qiseykerdişê xo rê wîna dewam kerd: ''Şingalî ser o kayê leyminî yenê kaykerdene. Verî zî kayê winayên ameye kaykerdene  la şarê Şingalî erdê xo canêverda û kayê înan pûç vetî. Rêxistinbîyayîşê êzidîyan ra tersenê coka plananê neweyan ê fermanî fînenî dewre. 2014 de Şingal de kam estbi? pêşmergeyê PDKyî. Verê qirkerdişî çeteyanê DAÎŞî vilawekî vila kerdî û vatbi 'ma do roşan de bêrê çayêkê şima bişimê.' Dima ra zî hêriş kerd.  Verî ke çeteyê DAÎŞî bêrê pêşmergeyanê PDKyî çeke êzidîyan arê dayî. Çend rojî verî zî hukmatê merkezê Iraqî zî waşt ke çekenê şarê êzidîyan bigero. No nîşane qirkerdişê bînî yo. Seba ke qirkerdişo pîl bêro kerdene wazenê êzidîyan bêpawitiş biverdî. Coka no qeraro sîyasî girewt ke peyê ci welatê Ewropa estî.''

Uca vat: ''Şingal herêma sîtatejîk de yo. Hetêkê ci Rojawan hetê ci yo bînî Îran o. Amerîka wazena tîya goreyê xo sîyaset rayra bêro. Planê Amerîka yê hêrişkerdişê Îranî estê, coka hewceyê Şingal a. Şingal cayêko merkezî yo aye ra reyna wazenê şarê êzidîyan bikerê qûrban. Şarê êzidîyan sey vizêrî ewro zî do milê xo çewt nêkero û nê planî zî pûç vejo. Xora Erdoganî zî îtîraf kerd pêkerdişêkê sey Şingalî semedê Mexmûrî zî wazenê. Dewleta tirke têna Şingal û Mexmûr nê wazena pêro Başûrê Kurdîstanî îşxal bikero. Her roje Herêmê Pawitişî yê Medya yenê bombardumankerdene ke nê hêrişî bi paştdayîşê PDKyî yênê kerdene. Heqê çewî/e çîn o ke bi qederê şarê ma kay bikero.''