Rojnameyanê tewr pîlan ê Fînlandîya ra Heksingin Sanomatî pare kerd ke DAÎŞijî kampa El Holî ra ameyî berdene bi Fînlandîya.

Selahîyetdaranê Wezaretê Pawitişî yê Fînlandîya na xebere tesdîq kerde û da zanayene ke cinî û domanî pê îmkananê xo Kampa El Holî ra derbazê Tirkîya bîyî û pê hetkarîya Sersefîrîya Fînlandîya ya Anqara ameyî welat.

Goreyê selahîyetdaran 3 keyeyî wisar de Kampa El Holî ra rematî û dekewtî Tirkîya. Sersefîrîya Fînlandîya zî pê hemkarîya selahîyetdaranê Tirkîya seba ke doman û cinîyî bêrê Fînlandîya pasaportê înan amade kerdî. Selahîyetdaranê tirkan û ajansê xeberan ê Fînlandîya Yla 12 zî pare kerd ke nê hemwelatîyî roja yewşemeyî pê teyara Tirkîra ameyî. Hetkarê Musteşarê Wezaretê Karanê Teberî Pekka Puustinenî îfade kerd ke rewşa nê cinî û domanan hol a û zanayîş nêda ke nê kesî senî derbazê Tirkîya bîyî.

Aqibetê 10 cinî û 30 domananê hemwelatîyanê Fînlandîya Kampa El Holî welat de bibi sebebê nîqaş û rexneyan. Eşkera bibi ke Wezîrê Karanê Teberî yê ê çaxî Pekka Haavistoyî seba ke nê cinî û domanî Hewlêrî ra bêrê Fînlandîya bi nameyê ''Operation Corpi'' planêk viraştbi û waştbi ke bêhayîya partîyanê koalîsyon û muxalefetî nê planî bîyaro ca.

Menga kanûne de partîyanê hukmatî seba aqîbetê hemwelatîyanê Fînlandîya yê Kampa El Holî pêkerdbi. Hukmatî bire dabi ke seba ardişî ê do hetkarîya domanan bikerê ka hetkarîya dadîyan nêkerê.

Îdareyê Xoserî yê Rojawanî dabi zanayene ke cîyakerdişê doman û dadîyan bêmerdimîye yo û pêşnîyazê Fînlandîya red kerbi. Hemserekê Konseya Karanê Teberî yê Kantonê Cezîre Abdulkerîm Omarî ardib ziwan ke ê do destûr nêdê ke domanî dadîyanê xo ra cîya bibê.