Xoverdayîşê Keyeyê Şenyaşarî roja 200. de yo. Bi vengdayîşê Komeleya Huqûqnasanê Seba Azadîye (OHD) serekê baroyan zî tede 200 avûkatî ke ameyî têhet  paştî daye Nobeta Edaletî ya Keyeyê Şenyaşarî.

Verî ke avûkatî eşkerayîye bidê polîsan dormeyê înan girewt. Eşkerayîye binê ablûqaya polîsan de ameye dayene. Eşkerayîye hetê Serekê Şubeyê OHDyî yê Riha Alî Aslanî ra ameye wendene.

Arslanî bale ante muhîmîya paştdayîşê ser û vat nê prosesî ke bêadeletîye pê destê hukmî yena kerdene de vera neheqîye yewbîyayîş û xoverdayîş şert o. Arslanî vist vîrî ke qirkerdişî 3 serrî xo dima verdayî û vat: ''Hema zî cipersayîşo mehkem nêameyo kerdene û qetilkerarî nêameyî cezakerdene. Dosya zî avûkatan û keyeyî ra yena nimitene. Seba ke teselê keyeyî mekamanê edlîyan ra kewt, 9ê adare de Nobeta Edaletî daye destpêkerdene ke 200 rojî yo dewam kena. Herinda caardişê edaletî de Keyeyê Şenyaşarî  seba ke edalet waşt raştê hêrişî ame Emîne Şenyaşar û Leajê ci Ferît Şenyaşar xeylêk rey ameyî destbendkerdene. Reyna seba ke ameyî derbkerdene xeylêk rey zî ameyî berdene nêweşxane. Bi îdîaya Emîne Şenyaşar berpirsîyarê qirkerdişî wekîlê AKPyî Îbrahîm Halîl Yildizî rê heqeret kerdo derheqê ci de dewa bi waştişê ceyaza 4 serran dewa ameye akerdene.''

Arslanî ard ziwan ke mekanîzmayê edaletî nêşuxulîyenê û vat: ''Seke yeno zanayenê xeylêk embazê ma seba ke wezîfeyê xo kerdo yenê muhakemekerdene. Reyna sîyasetmedarê HDPyî bîlasebeb yenê muhakemekerdene. Tirkîya de wezîfedarê dewlete pê hêzê dewlete heme sûcan kenê û bi polîtîkaya bêcezaverdayîşî yenê pawitene. Seba ke ma zanê qetilkarî yenê pawetene û heqdarî yenê cezakerdene ma paştî danê Keyeyê Şenyaşarî û vanê waştişê înan waştişê ma yo.''

Dima ra avûkatê keyeyî Bulent Duranî derheqê qirkerdişî û zanayîş da û vat qetilkarê ke eşkera yenê zanayene ameyî veradayene û Fadil Şenyaşar ame tepiştene. Duranî vat ê vera neheqîye kişta Keyeyê Şenyaşarî de yê û tim paştî bidê ci. Reyna serekanê baroyan zî qisey kerd û vat waştişê Şenyaşaran waştiê înan o.

Ferît Şenyaşarî ke peynî de qisey kerd, qala qewimîyayîşanê Nêweşxaneyê Dewlete yê Pirsûsî kerd.Şenyaşarî vat: ''Babîyê mi verê çimanê dayeka mi de ame lînçkerdene û birayê min ê birîndarî pê 24 guleyan ameyî qetilkerdene. Nê qalxanî nêeşkenê nê sûcê merdimîye biniminê.''