Keyeyê Şenyaşarî 40 serrî yo qezaya Pirsûsî ya Riha de esnafîye kerdêne. 14ê hezîrana 2018î de keye pê fermanê Wekîlê AKPyî Halîl Îbrahîm Yildizî rastê qirkerdişî ame. Yildiz a roje seba karê weçînayîşî dekeweno dikana Şenyaşaran û vano waştişê înan esto yan çin o. Keyeyê Şenyaşarî zî vano 'Merdimê xo şîyar bikerê, roniştoxan ecîz kenê, qiseyan erzenê kêna û cinîyan.' Naye ser o Yildiz wexto ke dikane ra vejîyeno nîşan dano û merdimê ey hêrişê keyeyê Şenyaşarî keno.

Hêriş de Adil, Mûhammed, Mehmet, Ferît û Celal Şenyaşar birîndar benê û wedarîyenê nêweşxane. La merdimê Yildizî nêweşxane de zî hêrişê keyeyê Şenyaşarî kenê. Babî Haci Esvet û dadîye Emîne Şenyaşar şinê Nêweşxaneyê Dewlete yê Pirsûsî. Merdimê Yildizî nêweşxane de pê kardan hêrişê Emîne û Esvet Şenyaşarî kenê. Babî Esvet Şenyaşar nêweşxane de yeno kiştene.

Fadil Şenyaşaro ke hêriş de birîndar bib, tedawî ra dima erzîya Zîndanê Xarpêtî û hema zî hucreyê yew kesî de tepişîyeno.

Emîne Şenyaşar û Ferît Şenyaşar 200 rojî yo verê Edlîyeya Riha de nobeta edaletî gênê. Roje çin a ke dayîke Emîne Şenyaşar nêbermena û hewar nêkena. Ê wazenê ke wa Fadil Şenyaşar bêro vera dayene. Fadil Şenyaşar pê îdîaya 'kiştişî' ame muhakemekerdene û ci rê cezaya 37 serran dîyaye.

Keyeyê Şenyaşarî serê sibayî dest pê nobete keno û şan agêreno banê xo. Hema hema her cayê Vakurê Kurdîstanî û Tirkîya ra merdimî, rêxistinê komelê sivîlî, rojnameger, avûkat, pawitoxê heqanê merdiman, partîyê sîyasî ûsn. nobeta keyeyî zîyaret kenê.

Ferît Şenyaşaro ke qirkerdişî ra verî mamostatîya demkî kerdêne xo dayo têkoşînê edaletî. Ferît Şenyaşarî her ca rê muracat kerd, her ber cêna û semedê birayê xo Fadilî edalet waşt. 200 rojan de 5 reyî ame destbendkerdene, îşkence dî.

Tewr peyên zî bê destûrê dozgerî Ferît Şenyaşar ameyo destbendkerdene. Ferît Şenyaşarî ney ser o vat: ''Polîsan nameyê dozgerî şuxilnayo û pê înîsîyatîfê mudurê şubeyê asayîşî ma destbend kerdî. Zîyaretî moral danê ma. Ma vatêne Tirkîya dewleta huqûqî ya la 200 rojî yo nobeta ma dewam kena û edalet çin a. Dozger û dadgerî vengê ma yê edaletî birnenê.''

Keyeyê Şenyaşarî di çîyan wazenê: Qeydê kamera yê qirkerdişê nêweşxaneyî wa tewrê dosya bêrê kerdene û Fadil Şenyaşar wa bêro veradayene. Keyeyê Şenyaşarî ano ziwan ke heta peynî ê do têkoşînê xo rê dewam bikerê. Nobeta înan a 200 roje zî na îdîaya înan îsbat kena.