Evîne Goyî dewa Helalî ya qezaya Qilebanî ya herêma Botanî de dadîya xo ra bena û 1988 de tewra PKKyî bena. Aye serkêşîya Şorişê Rojawanî kerde, vera DAÎŞî şer kerd û nê şerî de birîndar bîye.

Qirkerdişê Parisî yê 23yê Kanûne de Endama Konseya Rayberdişî ya KCKyî Evîne Goyî (Emîne Kara), hunermend Mîr Perwer û welatperwer Abdurrahman Kizil ameyî qetilkerdene. Embazanê Evîne yê têkoşînî derheqê aye de ANFyî rê qisey kerd.

Cahîd Heseno ke 2011 de Başûrê Kurdîstanî de Evîne şinasnaya, wina qala ci kerde: ''2011 de ma yewbînî şinasnayî. Menganê verênan ê 2016î de ma Rojawan de heman warî de bîyî û ma heman îdareyî de cagirewt. Bêguman ked û rolê Evîne Şorişê Rojawanî de pîl bîyî û aye serkêşîye kerde. Aye kar û xebatê TEV-DEM, komun û meclîsî kerdî. 

Aye Rojawan de karanê şaranê bînan de zî cagirewt. Rojawanê Kurdîstanî de dewan ra heta meclîsan her çi pê destê xo awan kerd, aye kedêka pîle daye rêxistinkerdişî zî. Awankerdişê Hêzanê Pawitişê Komelî de serkêşîye kerde. 2018 de rewşa ci ya weşîye xirab bîye la aye reyna zî têkoşînî ra fek vera nêda. Aye çar parçeyanê Kurudîstanî de şer kerd. Derheqê Qirkerdişê Parisî de Fransa ganî serê qirkerdişî nêgêra, qirkerdiş roşnî bikera. Ma do seba roşnîkerdişê nê qirkerdişî tim têkoşîn bikerê.''

Welatperwere Kelsuma Eyup da zanayene ke aye 2018 de Dirbêsiyê de Evîne Goyî şinasnaya û vat: ''Aye tim kombîyayîşî bikerdêne, rayîr mojnayêne ma. Şehîde Evîne xeylêk reyî ameye keyeyê ma. Keyeyê ma pê kerpîçî virazîyabi. Aye tim vatêne ke keyeyê ma ra zaf hes kena. O çax a perwerdeyê domananê mi de zî eleqedar bîyêne. Şarî cade tira zaf hes kerd. Ma do tim wayîrê keda aye vejîyê û rêçê têkoşînê aye de şorê.''

Evîne Seydoya ke 2017 de Evîne Goyî şinasnaya vat: ''Aye hêz dayêne merdiman. Nê paştdayîş û yewîya cinîyanê ma de keda aye zaf a. Embaze Evîne tim cesaret û hêz dayêne ma.  Xîtabê aye xurt bi, tim hêz dayêne şarî. Ma soz danê ke têkoşînê aye rê dewam bikerê. Ma do domananê xo bi têkoşînê aye pîl bikerê.''

Mihemed Xelefo ke 3 serrran hetê Evîne Goyî de mendo vat: ''Aye zaf qisey nêkerdêne, pê bêvengîye ma perwerde kerdêne. Aye Şorişê Rojawanî rê serkêşîye kerde. Bêvengîya hêzanê mîyanneteweyîyan a vera qirkerdişê embaze Evîne hemkarîya înan eşkera kena. Kesê ke vanê ê seba demokrasî têkoşîn kenê ganî vera nê qirkerdişî bêveng nêmanê ke wa dore nêra înan zî.''