Vengdayîşê HDPyî ser o kombîyayîşo yewin ê cigêrayîşê rayîrê hîrêyînî 13ê çeleyî de Anqara de amebi kerdene. HDPyî na çarçewe de kombîyayîşê xo yo diyîn bi hêzanê demokratîk, çapgîr, sosyalîst û şorişgêran de kerd. Kombîyayîşî ra dima eşkerayîyêka nuştekîye ameye dayene.

Hemserekê HDDPyî Mîthar Sancar û Pervîne Buldan, temsîlkarê EMEPî, Partîya Karkeranê Tirkîyan (TIP), Partîya Azadîya Komelkîye (TOP), Federasyonê Meclîsanê Sosyalîstan (SMF), Partîya Têgêrayîşê Kede (EHP) û Halkevlerî tewrê kombîyayîşî bîyî.

Kombîyayîş de bale ameye antene şerê Rûsya-Ukrayna ser û ame vatene ke ê do paştî bidê terefê haştîgîrî.

Kombîyayîş de koordînasyono hempar zî ame ronayene û wina ame vatene: ''Seba ke vera şerî îdîaya 'haştîye nika û her ca de' berz biba, vera krîzê ekonomîkî 8ê Adare, 21ê Adare û 1ê Adare de rojanê têkoşîn û paştdayîşî ma rêxistin bikerê. Ma bire daye ke pê tecrube û zanayîşê têkoşînê xo yê demokratîkî têgêrayîşanê neweyan de bêrê yewca û xebatanê hîrakerdişî bi dînamîkanê tewr hîrayan ê têkoşînê sîyasî û komelkî bi hawayêkê sîstematîkî hîra bikerê.''

Metno hempar ê partîyanê sîyasîyan wina yo:

''Polîtîkayê şerî herême û dinya de zêdîyenê. Welatê ma de krîzo ekonomîk zêdîyeno. Nê wextî de ke faturayê krîzî şarî rê birîyenê, karker, kedkar û xizanî têkoşînê rûmetênî kenê. Na rewşe her wextî ra zêdêr îmkan dana ke zemînê rêxistinîyayîşî û hîrabîyayîşî yê têkoşînê hemparî bêro awankerdene.

Ma qerardar ê ke kesanê haştîgîran, kedkaran, cuya vera talankerdişê xoza, azadîye, demokrasî, têdûştîye reyde şorê. Netîceya kombîyayîşî de ma seba awankerdişê bernameyê têkoşînê hemparî, plansazîya xebatanê ma koordînasyonêk awan kerd.

Na çarçewe de seba ke vera şerî îdîaya 'haştîye nika û her ca de' berz biba, vera krîzê ekonomîkî 8ê Adare, 21ê Adare û 1ê Adare de rojanê têkoşîn û paştdayîşî ma rêxistin bikerê. Ma bire daye ke pê tecrube û zanayîşê têkoşînê xo yê demokratîkî têgêrayîşanê neweyan de bêrê yewca û xebatanê hîrakerdişî bi dînamîkanê tewr hîrayan ê têkoşînê sîyasî û komelkî bi hawayêkê sîstematîkî hîra bikerê. Awankerdişê nê bernameyê têkoşînî yê hemparî mesuldarîya ma ya tarîxî ya. Bi paştdayîş, têkoşîn û hêvî...

EMEP-EHP-Halkevlerî-HDP-SMF-TIP-TOP”