Dima ke Heyetê Çimdarîye û Îdareyî 2021 de kewtî dewre înfazê bi seyan tepişteyanê sîyasîyan ameyî vêşnayene û astengkerdene. Heyetê Çimdarîye û Îdareyî heqanê bi seyan tepişteyan binpay kenê.

Endamê Komîsyonê Zîndanan ê Komeleya Huqûqnasan a Seba Azadîye (OHD) Yusuf Çakasî derheqê babete de ANFyî rê qisey kerd. 

Çakasî vat: ''Heyetê Çimdarîye ûn Îdareyî hetê dozgeran ra yenê îdarekerdene û pêro endamê nînan zî karmendê dozgerîye yê. Nê heyetî tepişteyan rê poşmanîye ferz kenê. Meseleya esase zî na ya ke nê heyetî sey mehkemeyan xebitîyenê. Seke Rewşa Îstîsnayîye de Mehkemeyanê Asayîşê Dewlete (DGM) se kerdêne Heyetê Çimdarîye û Îdareyî zî o qayde kenê. Kesê ke serranê 90an de ameybî destbendkerdene nêzdîyê 50 rojan nezaret de mendêne, nêeşkayêne avûkatanê xo bivînê. Hişmendîya Heyetanê Çimdarîye û Îdareyî zî wina ya. Nê heyetî bê avûkatan mehkemeyan awan kenê û tepişteyan muhakeme kenê.''

Çakasî îfade kerd ke Heyetê Çimdarîye û Îdareyî persanê ke karê îdareyê zîndanî nîyê persenê. Çakasî vat: ''Tepişteyê ke cezaya zîndanî ya 6 serran û hîrê mengan dîyaya nînan ganî 4 serran û 8 mengan ra dima vera bidîyê. La no çi zafê zîndanan de vurîyayo. Qanûnê înfazî bi ferzkerdişê poşmanîye bê tesîr bîyo.''

Çakasî ard ziwan ke meseleya kurdan dewam kena, nêameya çareserkerdene û vat: ''Meseleya ke çareser nêbîya tesîrê zîndanan ra heta kuçeyan kena. Nê heyetî zî paçeyê nê tesîrî yê. Na polîtîka zîndanan de ser nêkewte. Tepişteyî kurdayetîta xo ra û nêzdîbîyayîşê xo yê bi meseleya kurdan ra poşman nêbîyî.''