Mamosta û dadîya di domanan Cîhane Taha bi hawayêkê şikdarî Hewlêr de dinyaya xo bedilnabî. Cîhane Taha dima ke îqtîdarê Başûrê Kurdîstanî rexne kerdbî 26ê teşrîna verêne ya 2023yî de dewa Hevinga ya Hewlêrî de zereyê wesayîtê ci de amebî vêşnayene. 

Nê serebûtî ra dima selahîyetdaranê hukmatê Başûrî îdîa kerd ke delîlî çin ê. La keyeyê Cîhana Taha pare kerd ke eke Hukmatê Başûrî seba roşnîkerdişê serebûtî tênêgêro ê do pêro dinya de nê serebûtî rojdem bikerê. 

Waya Cîhane Taha Ceylane Taha derheqê serebûtî de Rojnewsî rê qisey kerd û vat: ''Selahîyetdaran vat ke waka mi xo kişto û bi nê hawayî xîret kerd ke serebûtî binimnê. La ma vanê qey nê serebûtî de bara hukmatî est a.''

Kekê Cîhane Şaxewan Taha paytextê Amerîka Washingtonî de, verê Qesra Sipî de seba roşnîkerdişê mergê waya xo destpêkê 2024î ra nata çalakîye keno. 

 La Tahayî 29ê sibate de wextê zîyaretê Serekê Herêma Kurdîstanî Mesrûr Barzanîyî de çalakîyêke kerde. Tahayî çalakîya xo de waşt ke wa mergê waya ci bêro roşnîkerdene.

La wextê çalakîye de pawitoxanê Mesrûr Barzanîyî hêrişê Tahayî kerd.

Şaxewan Tahayî ard ziwan ke ey gerreyê hêrişkeran kerdo.