Çalakîya ''Sefîrxaneyê dinyayêka newîye: Kurdîstan'' bi beşdarîya xeylêk hunermend, sîyasetmedar û akademîsyenan şaristanê Lozanî ya Swîsre de vizêr qedîyaye. Vizêr çarçewa çalakîye de 3 kargehê cîyayî ameyî kerdene.

 Kargehê verênî de Endama Akademîya Jineolojî Necîbe Qeredaxî derheqê Jineolojî de, Sahraya Rojawane ra aktîvîste Ahmedna Abdî M'barek derheqê Xopawitişê Sahraya Rojawane de û hunermenda lubnanije Marwa Arsanios zî derheqê babetanê polîtîk-hunerî de qisey kerd.

Nêmroje ra dima bi beşdarîya Rojîn Mûkriyan, Ahmedna Abdî M'barek û Marwa Arsanîos kargehê bi sernameyê 'Kulturanê Paştdayîşî' ame kerdene.

Rojîne Mukrîyan tîya de nêzdîbîyayîşê Îranî yê serê kurdan û serewedaritişê Jin, Jiyan, Azadî ercna.

Ahmedna Abdî M'barek derheqê qederê şaranê kurdan û sahrayîjan de qisey kerd û bale ante ser ke têkoşînê nê wird şaran zaf manenê pê. Marwa Arsanîos qala çimdarîyanê xo yê serê Rojawanî kerde.

Kargeho peyên zî 'Konfederalîzmo Demokratîk' bi.

Endama Kongreya Starî Rûxweş Şêxo kargeh de qala şorişê Rojawanî kerde û vat: ''Hêzê mîyanneteweyî vera sîstemê Rojawanî yê û kenê ke verê sîstemê Konfederalîzmê Demokratîkî bigêrê.''

Aktîvîsta bangladeşije Nazma Akter zî qala têkoşînê Bangladeşî kerde.

Peynîya çalakîye de dîrektora Tîyatroyê Vidy Vincente Baudriller, Endama KNKyî Nîlufere Koç û Hunermend Jonas Staal beşdaran rê sipas kerd. Dima beşdarî dormeya masaya xerîtaya Kurdîstanî de ameyî pêser û pîya sloganê 'Jin, Jiyan, Azadî' qîrayî.