Bi wesîleya 1ê Êlule Roja Haştîye ya Dinya de Amed, Wan, Îstanbul û xeylêk cayanê bînan de çalakîyî ameyî kerdene. Çalakîyan de hêrişê îqtîdarî ameyî şermezarkerdene û ame vatene ke Rayberê Şarê Kurdî Abdulah Ocalan aderesê çareserî û haştîye yo.

Amed de Platformê Kede û Demokrasî bi wesîleya 1ê Êlule Roja Haştîye ya Dinya eşkerayîyêke daye. Parlamenterê HDPyî yê Amedî Garo Paylan û xeylêk temsîlkarê rêxistinanê sîvîlan û partîyanê sîyasîyan tewrê ci bîyî. Eşkerayîye de ame vîrardene ke hukmat her ca de polîtîkaya şerî dano rayraberdene û ame vengdayene ke semedê haştîye gamî bêrê eştene.

Reyna Komeleya Heqanê Merdiman ya Amedî de zî hetê dezgehanê heqanê merdiman û hûquqî ra kombîyayîşê çapemenîye ame kerdene.  Eşkerayîye de ame vatene ke şer şaranê Tirkîya rê dano vînkerdene û veng dîya hukmatîke wa polîtîkaya şerî caverdo.

Bi eynî waştişî Wan de zî rixmê astengkerdişê polîsan eşkerayîyêke ameye dayene. Çarçewa Aktîvîteyanê Zîncîrê Haştîye yê HDPyî  de şarê Wanî waşt ke Parka Kale de bêro têhet la polîsan bi wesayîtanê zirxinan dormeyê înan girewt û destur nêda. Naye ser o şar verê banê HDPyî de kom bi û slogan û pankartan vera tecrîdî nêrazîbîyayîşê xo ramot. Çalakîya ka xeylê îdarekarê HDP, DBP û KCDyî û aktîvîstê TJA, endamê Mayanê Haştîye û temlîskarê rêxistinanê komelê sîvîlî  tewrê ci bîyî semedê wayîrvejîyayîşê haştîye ame vengdayene.

Îstanbul de zî Mayê Haştîye ke Beşîktaş de ameyî têhet  vera polîtîkaya şerî yê îqtîdarî laçikê xo yê sipî eştî erdî û vat: ''Hînî bes o.'' Mayan bale ante ser ke adresê çareserî Îmrali yo û waşt ke semedê ardişê haştîye wa her kes berpirsîyarîye bigero. Mayan vengdayîşo tarîxî yê Ocalanî yê Newroza 21ê Adar a 2013î  vist vîrî û vat tam şaran vatêne hinî haştîye yena ke tecrîd kewt dewre û verê haştîye ame girewtene. Mayanê Haştîye ke badê eşkerayîye laçikê xo yê sipîyî yê ke sembolê haştîye eştî erdî veng da wa her kes semedê ardişê haştîye rolê xo kay bikero.

Hetê bînî ra Hêzanê Demokrasî, Haştîye û Kede yê Îstanbulî ke Kadikoy de çalakîye kerde, vat bedelê ci çi beno wa bibo sey vizêr do ewro ra tepîya zî ma do hetê haştîye de bi û vengê têkoşînê haştîye berz bikerê.