Merdimê tepişteyan, rêxistinê komelê sîvîlî û partîyê sîyasîyî çarçeweya ''Abdullah Ocalanî rê azadîye, meseleya kurdan rê çareserîya demokratîke'' de çalakîyê ''Tecrîdî Biqedînê'' organîze kerdî. Xeylêk bajaran de verê bananê AKPyî de eşkerayîye ameye dayene.

Mêrdîn  de serkêşîya merdimanê tepişteyan, Meclîsê Dayîkê Haştîye, TUAY-DER, TJA,DBP, DEM Partî de verê banê AKPyî de eşkerayîye ameye dayene. Eşkerayîye de tecrîd sey sûcê merdimîye ame namekerdene û nê ameyî vatene:

''Qet yew qanûn de cayê tecrîdî çîn o. Tecrîd qirkerdiş o, çînkerdiş o. Coka ma sere de Îmrali tecrîdê heme zîndanan  şermezar kenê. Ma nê tewirê îqtîdarê AKP û MHPyî qebul nêkenê. Ma polîtîkaya îzolasyon û çînhesibnayîşî qebul nêkenê.  Ganî vera tecrîdî goş bidîyo waştişanê dayîkan. Dayîkê Haştîye verê zîndanan de vera tecrîdî vengê xo berz kenê û tewirê îqtîdarî qebul nêkenê. Wa îqîtdar ma goştarî bikero; rayîrê azadîye, hûzûr, demokrasî û haştîye Îmraliyî ra vîyareno. Coka ganî helêk cuwa ver meseleya kurdan bi rayîrê demokratîkî bêra çareserkerdene û berê Îmraliyî bêrê akerdene.''

Dayîka Haştîye Besna Gunay zî veng da Wezîrîya Edaletî û îqtîdarî û vat, ''Nê zulmî biqedînê. Kefenê ma milê ma de yo, ma haştîye û edalet wazenê. Hinî bes o. Wa bêrê zîndanan bêrê akerdene.''

Reyna Wan, Adana û Mersin de bi eynî waştişî çalakîyî ameyî kerdene.