Vera destsernayîşê şaredarîyanê DEM Partî yê Mêrdîn, Êlih û Xelfetî xeylêk bajaranê Kurdîstan û Tirkîya de şar vejîya kuçeyan û bi çalakîyan xespkerdişê îradeyî protesto kerd.

Amed de atktîvîstê TJA û îdarekarê DEM Partî û DBPyî yê bajarî û hemşaredarî û temsîlkarê xeylê dezgehan Parka Rojawanî de ameyî têhet. Şarî binê ablûaya polîsan de bi deyîranê xoverdayîşî govende girewt. Dima qiseykerdişan vera hêrişê vera îradeyî mesajê xoverdayîşî ameyî dayene.

Reyna Wan, Erzirom  û  xeylê bajaranê bînan de şaro ke vera vejîya meydanan vera qeyûmî hêrsê xo ard ziwan û vat vera hêriş û zextê îqtîdarî şarê kurdî do bi  xoverdayîşî ser bikewo.