Wekîlê HDPyî yê Îzmîrî Murat Çepnîyî derheqê fezlekeyanê 20 wekîlan de ANFyî rê qisey kerd.

Çepnîyî da zanayene ke weçînayîşê 24ê hezîrane ra nata derheqê wekîlan de fezlekeyî yenê amadekerdene. Çepnîyî bêvengîya CHPyî rexne kerde.

Çepnîyî vat: ''Ma weçînayîşê 24 hezîrane de serkewtişêko pîl vist dest. Ma bîyî kabusê îqtîdarî coka her roje embazê ma tepişîyenê, yenê destbendkerdene. Weçînayîşan ra dima bi seyan fezlekeyî ameyî amadekerdene. Nika zî dewaya qefilnayîşî û reyna dewaya Kobanê rojdem de yê. Ma sey HDPyî seba têdûştîya şaran, edalet û azadîye wazenê û cuyêka newîye pêşkêş kenê.  Ma têna seba kurdan nê seba her kesî demokrasî wazenê.''

Çepnîyî ard ziwan ke derheqê wekîlanê CHPyî de fezlekeyî yenê amadekerdene û vat: ''Meseleya qeyûmî zaf balkêş a. Dewlete şaredarîyê ma krîmînalîze kerdî, xeylêk îdîanameyî amade kerdî. Ma o çax vat sîyasetê qeyûmî seba pêro welatî rîsk o. Muxalafet bêveng mend. Ewro muxalafet perseno ke 128 mîlyar dolar kamca de yo. Ma verî îsbat kerd ke hukmat pereyan dano cerganê Sûrîye. Heta ke CHP meseleya Sûrîye nîqaş nêkero nêeşkeno aqîbetê 128 mîlyar dolaran eşkera bikero.''

Çepnîyî îfade kerd ke fezlekeyî parçeyêkê hêrişan o û vat: ''Nê erdî ser o 50 serrî yo kurdî seba heqê xo têkoşîn kenê. 17 hezar kesî seba ke kurdî kişîyayî, 4 hezar dewî ameyî vêşnayene û bi des hezaran kesî semedo ke kurd ê tepişîyayî. HDP rêxistina têkoşînî ya. Îtîfaqê demokrasî zî no yo. Ma muxalefetî rê vengdayîşê samîmîyetî kenê. Eke şima wazenê AKPyî ra bixelisê ganî vera kerdişanê ci bibê. Ma venga pêro muxalîfanê AKPyî danê ke wa samîmî bibê..''