25ê temmuza 2015î de endamê Federasyonê Komeleyanê Ciwanan ê Sosyalîstan (SGDF) wexto ke Merkezê Kulturî yê Amara de seba hetkarîya Kobanê eşkerayîye dayêne çapemenîye DAÎŞî hêrişê înan kerd û netîceya hêrişê bomba de 33 kesan dinyaya xo bedilnaye. Qirkerdişê Pirsûsî ra 5 serrî derbaz bîyî. Wekîlê HDPyî yê Îzmîrî Murat Çepnîyî ANFyî rê qisey kerd.

Çepnîyî vist vîrî ke cergê DAÎŞî o çax Kobanê de çin bîyî û vat: ''Sere de şarê kurdî xeylêk cayanê dinya ra merdimî ameybî têhet û xo ver dayêne. Bi nê hawayî Kobanê payan ser o mend. DAÎŞî zî o çax bin kewt. Xeykêk şaristananê Tirkîya ra hetkarîye erşawîyaye Kobanê. La na kampanyaya hetkarîye hetê dewlete ra ameye terorîzekerdene.

300 ciwanî Îstanbulî ra û cayanê bînan ra kewtî rayîr û Merkezê Kulturî yê Amara de ca bîyî. Pêvînayîşan dest pêkerdbi. Dima ke Qeymeqamî reyde pêvînayîş ame kerdene ciwanan waşt ke verê berê Merkezê Kulturî yê Amara de eşkerayîye bidê çapemenîye. Nê wextî de kiştoxan bombayê ke serê înan de bîyî, teqnayî. 33 ciwanî bi hawayêkê barbarî ameyî qetilkerdene.

Dima 5ê hezîrane de Amed de, 10ê teşrîna verêne de zî Garê Anqara de qirkerdişî ameyî kerdene.  Hêrişî vera partîya ma ameyî kerdene. 7ê hezîrane ra heta 1ê teşrîna peyêne şerêko gemarin ame kerdene. 7ê hezîrane de weçînayîşan de îradeyê HDPyî eşkera bi.

O çax AKPyî vat 'Ya şima 400 wekîlan danê yan zî kaos vejîyeno.' Bi nê hawayî prosesê 1ê teşrîna peyêne dest pêkerd. Qirkerdişê Pirsûsî pegoşî ra nêame kerdene. Ganî merdim vajo ke Qirkerdişê Pirsûsî organîzayonêkê dewlete bi. Kiştoxî bi asanî kewtî Merkezê Kulturî yê Amara. ''
Çepnîyî serra 5. ya Qirkerdişê Pirsûsî de reyna vat: ''Seba Pirsûsî edalet, seba her kesî edalet.'' 

Çepnîyî ard ziwan ke AKP û MHP şerî ra ber çîyêk nêdanê û vat: ''AKP şîrket û projeyêkê ÎHA û SÎHAyan o. Şarê ma xo ver danê û do hesabê nê çîyan bipersê.''