Wekîlê HDPyî yê Îzmîrî ard ziwan ke dewlete hem erey resaye herêmanê erdlerzî hem zî dest da hetlkarîyan ser o û vat, no îqtîdar, hetkarî zî hemverê xo de sey talûkeyêkî vîneno.

Parlamenterê HDPyî yê Îzmîrî Mûrat Çepnî ke roja verêne ra yo ke Meletî de yo, ANFyî rê qisey kerd.

Çepnîyî ard ziwan ke qezaya Doganşehîr û Akçadagîde, dewanê înan de rijyayîşêko pîl est o û vat, ‘‘Akçadag û merkezê Meletî de rijyayîşêko pîl virazîya û xeylê însanî merdî. Dewan ra zî zaf însanî merdî. Bêguman rijîyayîşê dewe û bajaran cîya yo. Çunke seba ke şîyayîş û ameyîşê dewan zehmet o û hetkarî zaf erey şîye, xeylê însanê ma dewan ra bêîmkanîye ra merdî.

Organîzasyonê hetkarîye ameyî astengkerdene

Çepnîyî vîst vîrî ke sey partî, ê hema cayanê erdlerzî ra bikoordîne vila bîyî û îqtîdarî xeylê astengîyî vetî vernîya înan û vat, ‘‘Roja erdlerzî ra yo ke ma herême de yê, TIRê her cayê  welatî ra ameyêne malzemeyê xo ronayêne depoyanê ma û ma zî dewe û herêmanê bînan ra vila kerdêne. No hema zî dewam keno. Dewlete asteng kena. Dest dana çadiran ser û kes nêzano ke bena kamca. Rey-rey, şar şexsî şino bajaranê bînan ra xo rê malzeme ano la dewlete dest dana înan zî ser o. Îqtîdar  hetkarîyan zî seba xo tehtîdêk vînena.

Sere ra heta peynîye prosesêko sîyasî yo

‘‘Destpêkî ra proseso sîyasî est o. Na felakete nîya. Rîyê bêplanîya dewlete, redkerdişê rastîya zanistî û polîtîkayê bêrêxistin verdayîşê şarî ra, erdlerz bedilîya bî felakete.