Dewleta Tirkî ya bi îdareyê AKP-MHP’yî ke wazenê Şorişê Rojava yê binê serkêşîya Têgêrayîşê Azadîye de yo bigîrê binê kontrolê xo û tasfîye bikerê DAÎŞ û Nûsra dir û organîzasyonanê çeteyan ê bînan dir hemkarî kerde, koalîsyonê çeteyan viraştî, dima ra zî rasterast dest bi hêrişê îşxalî kerd. Rixmê nînan de zî gama ke nêeşkaye aver şiro serê planêkê bînî yê alternatîfî de xebitêna. Goreyê nê xeylî mendeyanê çeteyan ê ke ‘bi eslê xo Kurd ê’ û Rojava de yê ke PDK înan rê nizd o, tayê kesê ke îxanet PKK’yî rê kerdê û xo bi PDK’yî girewtê zî yenê razîkerdene û bi nameyê “Cepheyê Yewîya Neteweyîye/ Herêmîye ya Sûrîye” Tabûranê Tayyîbîye yê neweyan ceribnenê.

Goreyê hayîdarîyanê ke kewtê dest, verhadreyîyê cepheyî yê bi fînansmanê Katarî peynîya 2016’an de dest pêkerdî û destpêkê 2018’an de temam bîyî. Programê cepheyî, projeyê ci, şemaya organîzasyonê zereyênî û fermandarê înan ê leşkerîyî zelal bîyî. 

TEWREYÊ XAYÎNAN

Amac û hedefo sereke yê cepheyî; hêrişê serê Îdareyê Xoserî û hêrişê serê QSD’yî û şarê organîzekerde yê Vakûrê Sûrîye yê. Mîyanê nê cepheyî de beşê ENKS’yî yê ke Tirkîya û Hewlêr de yenê ‘pîlkerdene’ Partîya Azadî, îdarekarê Yekîtî (Îbrahîm Biro, Fuad Elîko, Sîyamend Haco, Evdilhekîm Beşar û merdimê înan) û keso bi nameyê Rustemî ke Rojava de maneno, Ebidezîz Temp, Ebidzeraq Temo û 500 kesê ke şirawitê Tirkîya, keyeyê Hîlo yo ke başûrê Serêkanîye de ciwîyeno, şêxanê eşîrete ra Idwana û şexsê ke Rojava de yê. 

MESULDARO PÊROYÎ MÎT’Î RA YO

500 kesê ke nameyê înan hetê Rustem, Ebidezîz Temo, Ebidrezaq Temo’yî ra ameyê hadrekerdene û şirawîyayî bi Tirkîya, kampanê girewteyan de hetê pispor û efserê Tirkan ra ameyê perwerdekerdene. Goreyê nûşteyanê ke mabênê kesanê ke îdareyê Cepheyî de yê ameyê nûştene, yeno famkerdene ke mesuldaro pêroyî yê cehpeyî cagirewtoxê Necdet Ozelî (serekgeneralo pêroyî yê Tirkan o verên), endamê MÎT’î Orhan Sunay o. Sunayî zî 63 kesê  ‘efserî’ seba operasyonî hadre kerdî.

Zereyê cepheyî de 4 efserî zî estê ke artêşa Sûrîye ra visîyayê û bi nameyê ‘OSO’ mîyanê çeteyan de ca girewto. Kesê ke dereceyê îdareyî de yê nê yê:

*Fermandarê Cepheyî Emîd Ridwan Elelî; Xumis ra yo, Eşîreta Elneîmî ra yo, Erebê Sunî yo.

*Mesuldarê Îstîxbaratî Emîd Nesîr Mistefa, Xama ra yo.

*Fermandarê hêzê bejahîyî Emîd Eşref Elî Elebîdellah; Idlîb ra yo.

*Mesuldarê karê îdarîyî Emîd Heysem Cemîl Elîfêsî; Xama ra yo.

ÎDAREKARÊ CEPHEYÎ

Îdarekarê cepheyî zî efseranê çeteyan ra, kadroya ‘Birayê Muslumanî’ ra yeno pê ke nê artêşa Sûrîye ra visîyabî û dereceya îdareyî de zî hemkarîya AKP-MHP-PDK’yî esta:

* Osman Ocalan

* Nîzamettîn Taş

* Mahmût Muhammed Şakir

* Kerîm

* Fewaz Mahmud Silêman

* Hisên Xelîl Derwêş

* Egid Munir Hitahit (Ebu Basim)

* Nesir Mustefa

* Etellah Hac Neca (Eşîreta Idwana ra)

* Beşar (Xiristiyanê Qamiloyî yo, tacirê zerrnan o)

* Ebu Kabî (Komela Dêra Elmilîya ra)

PLANKARÎYA HÊRIŞÎ

Dimayê gefanê ‘operasyonê rojakewtena Firatî’ yê serekkomaro Tirk Recep Tayyîp Erdoganî û seba ke tewirê rayapêroyîye û yê Kurdan şenik bikero bi vatişanê êyê sey “wayîrê Kurdan ma yê, Kurd û YPG cîya yê” yeno famkerdene ke na plankarîya hêrişî yê “Tabûranê Tayyîbîye” ya. Goreyê na plankarîye hêrişî di cepheyan ra ameyî kerdene: 

*Cepheyê Minbicî; Qerar ame girewtene ke Zahir Elsakit û Ebîdcebar Elîgêdî fermandarîya tîyayî bikerê.

*Cepheyê Kobanê û Girê Spîyî: Do emanetê fermandarîya Mahmûdî (Wezîrê verên ê OSO‘yî) û Emîd Ebîdbasit Elmuhemedî bêro kerdene.

KAM O NO ELÎGÊDÎ?

Abidcebar Elîgêdî yo ke nameyê ci tîya ravêrt, 2013 de endamê Konseya Leşkerîye ya wextê Selîm Îdrîsî yê mesuldarê Helebî bi. Bi fermandarîya çeteyê Lîwa Tewhîdî yo ke bi dişmenîya Kurdan yeno zanayene ardîbî serê mesuldarîya Helebî. Yew ê 60 fermandaranê ‘OSO’yî yê ke tewrê kombîyayîşê Gulan a 2013’î ya Dîlokî bîbî û plankarîya ci hetê MÎT’î ra amîbî kerdene û planê qirkerdişê Kurdan tede amebi viraştene, Abidcebar Elîgêdî bi. Kombîyayîşî de qerarê qirkerdişê Kurdan bi vîdeoyêk amebi eşkerakerdene. Elîgêdî nê qerarî ra dima, Temmuz a 2013’î de morê xo dabi qirkerdişê Tel Eran û Tel Hasilî ro.

TV’YANÊ PDK’YÎ DE PROPAGANDA

Osman Ocalan û Nîzamettîn Taşo ke Tabûranê Tayyîbîye de ameyê nûştene, pîya bi hadreyîyanê îşxalî û hêrişî bi argûmanê ke Têgêrayîşê Azadîye sîya kenê û hêrişanê îşxalkaran ê dewleta Tirkî meşrû kenê televîzyonanê PDK’yî de vejênê.

 ‘KOMARA TIRKÎYA YA XURTE’

Beyanato ke 13’ê Hezîrane 2018 de serê nameyê Cepheyê Yewîya Neteweyî yê Sûrîye ame weşanayene, xora nasnameyê nê organîzasyonî ramojneno, beyanatî de yeno vatene, “Hendî wextê ci ameyo ke ma Kurdan zulmê terorîstan ê PYD’yî û YPG’yî ra bixelisnê, hendî do çirey nêeşkê gefan sînoranê dosta ma Tirkîya rê biwerê”, heqaret şervananê QSD û YPG-YPJ’yî rê kerdibi ke şerê hemverê DAÎŞ’î de şehîd kewtîbî û wina vatibi: “Rixmo ke do nêeşkê hemverê hêzê Komara Tirkîya ya xurte de şer bikerê zî îdarekarê PYD û YPG’yî bêheq verê înan danê mergî ser û kenê ke sifetê ‘şehîdî’ bidê înan ra. La no îdareyo ke do dimayê operasyonî bêro ser, do sîyasetêkê bê zordarî rayra bero û heqanê heme şaran bido.”