DEM Partî Meydanê PTTyî yê Çewlîgî de mîtîngê xo kerd. Mîtîng de bi hezaran kesan sloganê sey ''Jin, Jiyan, Azadî'' û ''Bijî berxwedana zîndanan'' vatî. Hemsereka DEM Partî Tulaye Hatîmogullari û Hemsereka DBPyî Çîgdeme Kiliçgun Uçar bi seyan kesan reyde pîya bînaya partîye ra ver bi meydanî şîyî.

Mîtîng de hêverî namzeda Şaredarîya Çewlîgî Çîçeke Ariç qalê projeyanê înan ê seba cinîyan kerd. Dima namzedê Şaredarîya Çewlîgî Aydin Burçunî qisey kerd û vat ke ê do ser bikewê.

Tornê ci rîyê Şêx Seîdî sîya nêkerê

Mîtîng de Çîgdeme Kiliçgun Uçar şar bi kirdkî selam kerd û vat: ''Serê Çewlîgî de kay, dek û dolabê îqtîdarî est ê. Şêx Seîd seba kurdan erjêko pîl o. La ê bînî Şêxê ma seba menfaetanê xo şuilnenê û ci rê heqaret kenê. AKP keno ke bi qeyûman Kurdîstan de vindero. AKP partîya kurdan nîyo la dişmenê kurdan o. Şêx Seîdî wexto ke ameyêne dardekerdene vatbi 'Ma çîyo xirab nêkerd ke tornê ma ma ra şerm bikerê.' Îqtîdarêko ke wazeno kultur, ziwan, nasnameyê kurdan çin bikero do nêeşko Kurdîstanî îdare bikero. Ganî tornê ci rîyê Şêx Seîdî sîya nêkerê.

Ganî tecrîdê Îmraliyî wedarîyo û Birêz Ocalan de dîyalogî bêrê kerdene. Şarê Çewlîgî tim wayîrê têkoşînî vejîya. Yewîya kurdan do îqtîdarî rê biba cewabêko tewr pîl. Ma nika ra şaredarîya Çewlîgî girewte. Şarê ma rê bixêr bo.''

Wa her kes tewrê xebatan bibo

Hemsereka DEM Partî Tulaye Hatîmogullari zî bale ante ser ke Şaredarîya AKPyî Çewlîgî rê xizmet nêkena û vat: ''Seba ke şarê xo rê xizmet bikerê ma hê yenê. Çewlîg de ma vera erdlerzî pêro tedbîranê xo bigêrê. Ferasetê AKPyî wexto ke ma Meclîs de bi zazakî qisey kenê vengê ma birnenê la tîya de deyîranê bi zazakî vanê. Çewlîg de AKP û MHP hemkarîye kenê. 

Erdogan ma rê vano ke 'xo îsbat bikerê.' Ha no meydano qerebalix îsbatê estbîyayîşê ma yo. Emser Newroze de bi mîlyonan kesî qîrayî û înan azadîya Ocalanî û çareserîya meseleya kurdan waşte. 

Weçînayîşan rê tay mendo. Ganî şarê Çewlîgî bi ruhê seferberî tewrê xebatan bibo, wayîrê sindoqan vejîyo û rayanê xo bido DEM Partî. Wa her kes seba erkdarîya sindoqan xo qeyd bikero. Ma pê bawer ê ke ciwanê Çewlîgî do rayîr nêdê dizdî û talanî.''

Mîtîng de Biro Avîs û Ciwan Adar vejîyayî sehne ser.