Rayber Apoyî çend rojî verî keyeyê xo reyde pêvînayîş kerd. Wekîlê DEM Partî yê Wanî Sinan Çiftyurekî derheqê babete ANFyî rê qisey kerd.

Sinan Çiftyurekî vist vîrî ke çend serrî yo semedê pêvînîyaşî senî xebatî ameyî kerdene ser û nê vatî: ''Eslê xo de sîyaset û şarê kurdî û cinîyan semedê wedaritişê tecrîdî çar serrî yo xeylêk xebatî kerdî. Bitaybetî serra peyêne de çar leteyanê Kurdîstanî û teberê welatî de şarê kurdî û dostanê ci çîyo ke destê înan ra ame kerd û bi hewayêkê qerardarî seba ke na neheqîye û bêhuqûqîye bêro wedaritene têkoşîn kenê. Bi pêvînayîşê wekîl Omerî gama verêne ya wedaritişê tecrîdî ameye eştene. Xora heqê pêvînayîşî amebi xespkerdene. Ganî tecrîd bi temamî bêro wedaritene ke keye û avûkatî bieşkê pêvînayîş bikerê û fîkranê ci yê sîyasî û pêşnîyazanê ci biresnê komelî. Ganî îtîfaqê Dewlete û Cumhurî zî semedê wedaritişê tecrîdî gamanê zixman bierzo.''

Çiftyurekî bale ante mesajê  'eke şertî bêrê pêardene hêzê mi est o ke ez prosesî pêkewtişan ra bikirişişê zemînê sîyasîyî' yê Rayber Apoyî ser û vat: ''Vatişê Birêz Ocalanî muhîm o la çîyo esas muhîm oyo ke pêvînayîşê avûkatan bêro kerdene ke fîkîr û pêşnîyazê ci biresê şarî. Mesajê ci ra yeno famkerdene ke vano wa dewlete semedê çareserkerdişê meseleya kurdan gaman bierzo. Semedê haştîya mendîye ganî verê azadîya fîzîkîye ya Rayber Apoyî bêro akerdene.''