Dewaya Kobanê ya ke hemserekê verênî yê HDPyî zî tede 108 kesî tede yenê muhakemekerdene roja dişemeyî do dest pêbikera. Wekîla Parlamentoya Ewropa Evîne Încîr û Brando Benifei sey temsîlkaranê Demokratan ê Sosyalan dewa do teqîb bikerê.

Evîne Încîr derheqê babete de ANFyî rê qisey kerd.

Evîne Încîr vist vîrî ke Mehkemeya Heqanê Merdiman a Ewropa (MHME) derheqê Selahattîn Demîrtaşî de bira veradayîşî dabi la Erdogan û hukmatê tirkî bire rê bêhûrmetîye kerde û nêarde ca. Evîne vat: ''Demokratê Sosyalî tim sere de Selahattîn Demîrtaş verdayîşê pêro tepişteyan ê sîyasîyan biwazê.''

Wekîle Evîne Încîr bale ante ser ke Serekê Konseya Ewropa Charles Michel û Sereka Komîsyonê Yewîya Ewropa (YE) Ursula von der Leyen zîyaretê xo yê Tirkîya de ard ziwan ke ê pê binpaykerdişanê heqanê merdiman qerqilîyenê. Evîne Încîr pare kerd ke heta ke Tirkîya heqanê merdiman de aver şora ê do mesele teqîb bikerê.

Evîne Încîr îfade kerd ke wekîlanê Parlamentoya Ewropa (PE) raporêkê xo de vat ke wedaritişê Peymana Îstanbulî yê Tirkîya nêno qebulkerdene û ganî muxalîfî bi hawayêkê rehetî bixebitê. Evîne Încîr eşkera kerd ke rapor PE de ame qebulkerdene û do bêro weşanayene.

Evîne Încîr da zanayene ke a do Brando Benifei reyde dewaya Kobanê teqîb bikerê û ê do selahîyetdarêkê HDPyî kombîyayîşê grûbe yê PE rê dawet bikerê. Evîne Încîr ard ziwan ke wekîlê PE do qetî qefilnayîşê HDPyî qebul nêkerê û vera ney têkoşîn bikerê.

Dewaya Kobanê rojdemê Parlamentoya Swêdî de ya

Hetê bînî ra roniştişê pereyînî yê Parlamentoya Swêdî de Dewaya Kobanê ameye ardene bi rojdemî.

Wekîlê Partîya Lîberale Fredrik Malmî îfade kerd ke hukmatê tirkan sey dîktatorîye xebitîyeno û muxalîfan, pawitoxanê heqanê merdiman tepişeno. Malmî Wezîra Karanê Teberî Ann Linde rê pers kerd ke ê do vera Tirkîya mabargo bîyarê ca yen nê.

Wekîla Partîya Çepe Hanna Gunnarsson zî Dewaya Kobanê viste vîrî û vat: ''Kesê ke şarî weçînayî û tepişîyayî û do vejîyê verê mehkeme. No seba heqanê merdiman babetêka xaf cidî ya.''

Ann Linde parlamento de qisey kerd û pare kerd ke Partîya Karkeran a Demokratanê Sosyalan seba partîyanê xo yê wayûbirayan CHP û HDP têkoşîn kenê û a zî vervatoxîya nê têkoşînî kena. Linde eşkera kerd ke aye pêvînayîşanê xo yê bi Tirkîya de na babete arde rojdem û tepişîyayîşê sîyasetmedar û muxalîfan nêno qebulkerdene.