Gama ke  ma ver bi herêma erdlerzî şiyênî, ma nêzanayêne ke dej û rijnayîş senî gird o. Ma hêver verê xo da Hatayî. Waştişê ma o bi ke ma dej û hêrsê înan bare bikero û bidê eşnawitene. Ma ne hetê ruhî ra ne hetê bedenî ra hazir bî. Dejê ma pîl bi la ma zerrî dayêne xo, hêvî kerdêne.

Seba ke şar wayîrê mexdûran vejîyayêne nê hêvî dayêne ma. Rayîr de bi seyan wesayîtî, TIRî semedê hetkarî şîyênî herêma erdlerzî. Şarî bi îmkananê xo, çîyêko dewlete nêkerd, kerdêne. Pê îmkananê xo hetkarî kerdêne. Hela ke tesîsanê arisyayîşî de vindetî û rayîr de mi dî ke; feqîrî, karkerî,kedkarî senî paştî danê yewbînan.

Dewlete TIRî vindarnayî

Qet dezgehêke dewlete, komele, cemat, waqif yê ke bi nêzdîbîyayîşê dewlete yenê zanayene rojanê verênan de binate de çînêbî. Hetê xo bewlî kerdbi la şaran zî hetê xo bewlî kerdbi. Karkeran rixmo ke beno ke karê xo ra bibê, bi xo bîbî organîze, bi îmkananê xo yê kêman hetkarî arê dabî û verê xo dabi herêmanê erdlerzî. Ma dewlete verî dekewtişê Hatayî dî ke tay TIRê hetkarî vindarnaybî. Dewlete seba ke desturê makînayanê karî medo û bibo sebebê ereyşîyayîşê hetkarî, estbîyayîşê xo mojnabi.

Hêrs, dej û bêçareyîye

Ma şewe resayî Hatayî; rîyê hetkarîya konvoyanê şarî ra ma 27 saetî de rasayê ca. Çîyo verêno ke mi tîya hîs kerd, dej û hêrs bi. Binateyê zimistanî de serd û sipir de şarê Hatayî kuçeyan de kerdêne ke xo germin bikero û merdimanê xo binê rijnayîşî ra vejo.

Hîrê rojî dewlete çînêbî

Heta roja hîrêne qet wesayîtêkê dewlete çînêbi. Qet çew kuçeyan de nêesayêne. Şaredarîye muxalîfî û zerrîwazî, kuçe bi kuçe gêrayêne, hetkarî kerdêne. Hêrsê şarî zî zêdîyayene. Zerrîwazî ûca bi zî, şarî cayê xo de dewlete waştêne. Şar hesabê bacê erdlerzî persayêne û dewleta ke nêameya ci rê lanet wendêne. Cayo ke tede dewlete çîn a, dewlete nêwazena bêro ûca, ma tîya de bî. Şarî bi destanê zitan binê rijnayîşî ra cehd kerdêne ke merdiman û dostanê xo vejo.  Welatperwer û şorişgêrê bi zerrîwazî ameybî cehd kerdêne ke birîndaran bine jirnayîşî ra bixelisnê.

Verî welatperwer û şorişgêrî vazdayî gazîya şarî

Dej hendê bêçareyîye gird bi. Cayo ke dewlete wazena veng bikero de şar wayîrê herre û vîranê xo vejîyayêne. Şaro ke her cayê Kurdîstan û Tirkîya ra amebi, kerdêne ke birînanê şarî bipêşo, bêçareyîya ci rê bibo çare. Şoroşgêr û welatperweran çorbayêka germin kerdêne vila. Cayo ke dewlete nêwazena ûca bo, ûca nêbî, welatperwer û şorişgêrî ûca estbî. Verî ê vazdayî gazîya şarî û rixmê şertanê zehmetan şar têna caêverda.

Pêro pîya xebitîyayî

Hatay de sere de HDP û HDK, TÎP, TOPî cayanê cîya cîyayan de herêmê hetkarî awan kerdî û hetkarîya ke resayê înan bi hewayêkê biorganîze, biplanî vila kerdî.  Her herême de revîrî akerdî û bi  wezîfedaranê weşîye yê zerrîwazan derman resna şarî. Hetê îdeolîjî ra yew bînan ra dûrî vinde zî semedê hetkarîya şarî bikoordîne xebityayî. Têna şar nê, leşkerê ke dewlete roja çarine de şawitî ê zî mecbur mendê ke şorişgêran reyde bixebitê.

Keyfê dewlete pê nêame

Zerrîwazê ke ameyî zaf wext vêşan rakewtî, serdî de rakewtî. Heme hatkarî resna kesanê hewcadaran. Seba ke şar wina wayîrê yewbînan vejîya, keyfê dewlete pê nêame. Cehdkerdişê provokasyon û hêrişî bîyî. Qîm nêkerd; polîsê TEMî û leşkerî xo ardî.  Nê zî qîm nêkerd, komel, cemat û weqfê ke bi nêzdîbîyayîşê xo yê dewlete yenê naskerdene ardî.  Dest pê propagandaya reşa ya vera şorişgêran kerd. La şaro ke hela verêne ra dormeyê xo de şorişgêran vîneno, goş na pa nêkewt.  Paştîya şarî şorişgêran ra pêt bî.

Badê Hatayî Elbîstan

Gama ke ez şîya Elbîstan mi ferq kerd ke rewşe senî giran a. Şewê Elbîstanî heta kêmek 25 derece yeno war. O serd û sipir de mumkun nîyo ke çew teber de bimano. La HDP, HDK, TîP û Partîzanî yewbînan de bikoordîne hetkarî resnayêne şarî. Verî problemê cayêmendişî ser o vindertî , xeym û sobayî ke kewtê destê înan resnayî şarî. Keye û dewê ke hewcadarê hetkarî yê, yew bi yew tesbîtkerdêne û hetkarî resnayêne înan. Şorişgêranê ke hetkarî vila kerdêne qemîş nêbîyêne ke yew piranê nanî biwerî. Bi qala kilme  rewşa ke tîya qewimîyaye Dayîka Zore (65) vat: ''Gama ke çew çînêbi, şima ameyî, Homa kêmayîya şima memojna na.''