HDPyî Êlih de bi şîarê 'Şer û xizanîye rê ney' mîtîngêk kerd. Bi hezaran kesî tewrê mîtîngî bîyî. Hemsereka Pêroyî ya DBPyî Salîha Aydenîz mîtîng de qisey kerd.

Aydenîze vist vîrî ke îqtîdarê AKP-MHPyî seba ke weçînayîşan de ser bikewo hêrişê kurdan keno. Aydenîze qirkerdişê Parisî zî şermezar kerd û waşt ke wa qirkerdiş bêro roşnîkerdene. Aydenîze vat: ''Îqtîdar wazeno pê qirkerdiş û hêrişan xoverdayîşê ma, sîyasetê ma çin bikero. Îqtîdarî dima ke Rojawanî ra netîce nêgirewte hêrişê Başûrî kerd û uca ra zî hêrişê Vakurî kerd. Heta ke tecrîd dewam bikero nê polîtîkayê şerî zî do dewam bikerê. Nêzdîbîyayîşê Ocalanî nêzdîbîyayîşê azadîye yo. Ganî Ocalan bieşko cade avûkatanê xo bivîno. Azadîya Ocalanî nêzdî ya. Seba ney zî ma do têkoşînê xo her ca de têkoşîn bikerê.''

Aydenîze ra dima Hemserekê Pêroyî yê HDPyî Mîthat Sancarî zî qisey kerd. Sancarî bale ameye antene destbendkerdişê Keskîn Bayindirî ser û vat ke îqtîdar pê nê hêrişan peynîya xo amade keno. Sancarî Qirkerdişê Parisî yê 23yê Kanûne zî şermezar kerd û venga Fransa da ke Qirkerdişê Parisî yê 23yê Kanûne û 9ê Çeleyê 2013î roşnî bikera. 

Sancarî bale ante tecrîdê vera Rayberê Şarê Kurdî Abdullah Ocalanî ser û vat: ''Key polîtîkayê şerî giran bibê tecrîd zî yeno girankerdene. Ma wazenê ke tecrîd wedarîyo. Ma zî waşt ke Ocalan de pêvînayîş bikerê. Ma tîya de adresê çareserîya meseleyanê Tirkîya mojnenê; adresê çareserîye çimanê şarê ma de ya. Ma do nê sîstemê zulm û talanî bibedilnê. Ma do pîya ser bikewê.''

Mîtîngî ra dima bi hezaran kesan pîya ver bi bînaya HDPyî ya Êlihî dest pê rayraşîyayîşêkî kerd. Rayraşîyayîş de fotografê hîrê şehîdanê Qirkerdişê Parisî ameyî kiriştene. Girseyî çalakîye de sloganê sey “Bijî Serok Apo”, “Jin, jiyan, azadî” û “Bê Serok jiyan nabe” vatî. Rixmê astengkerdişê polîsan zî rayraşîyayîş heta bînaya partîye dewam kerd.