Platformê Dezgehanê Demokratîkan deklarasyonê mîtîngê 'Demokrasî û Azadîye' yê 17ê teşrîna peyêne eşkera kerd. Hemserekê DBPyî Çîgdeme Kiliçgun Uçar û Keskîn Bayindir, wekîlê DEM Partî û aktîvîstê TJA tewrê eşkerayîye bîyî. Mîtîng Çarrayîrê Basinî de do bêro kerdene.

Kurdkîya deklerasyonî aktîvîsta TJA Havva Can wende. 

Deklarasyon de dîya zanayene ke Rojhelatê Mîyanênî û herême de krîz, şer û trajedîyê pîlî qewimîyenê ke paradîgmaya Konfederalîzmê Demokratîkî ya Rayber Apoyî seba çareserîya înan şensêkê pîlî pêşkêş kena.

Deklarasyon wina dewam keno: ''Îqtîdarê Tirkîya pêro meşrûtîyetê xo destî ra dayo. Îqtîdar seba çareserîya meseleya kurdan gamêka asaye nêeerzeno. Birêz Abdullah Ocalanî çend reyî vet werte ke o wayîrê hêzê çareserkerdişî yo la no şens ame xerckerdene. 

La nîqaşê serê meseleya kurdan ancî zî girîng û musbet ê. Beyanê Birêz Ocalanî 'Tecrîd dewam keno. Eke şertî virazîyê ez eşkena zemînê şîdetî û pêkewtişî bivurna zemînê sîyasî û huqûqî' zaf girîng o. Şarê kurdî zî Birêz Ocalanî sey îradeyê çareserîye û muxatabê çareserîya meseleya kurdan qebul keno.

Îqtîdar ganî seba ke samîmîyetê xo îsbat bikero gamanê musbetan bierzo. Îqtîdar hetêkî ra haştîya zereyî ra qal keno la hetê bînî ra eqsê ney polîtîkayan keno; hêrişê kurdanê Rojawanî keno, qeyûman tayîn keno.  Bi nê hawayî îqtîdar do nêeşko netîce bigêro. Bi qeyûman mesele çareser nêbena, şarê kurdî zî verê nê hêrişan de do sereyê xo nêaro war. Îqtîdar wa cade xespkerdişê şaredarîyan û polîtîkayanê şîdetî ra fek vera bido.

Sere de kurdî cinî, ciwan, kedkar, şar û pêro bindestî pabeyê ci yê ke îqtîdar nê nîqaşan de zelal û samîmî bibo. Seba ney zî ganî hêverî tecrîd bêro wedaritene û azadîya Birêz Ocalanî bêra caardene. Ganî Birêz Ocalan bieşko keye, avûkatanê xo û terefanê çareserîye de pêvînayîş bikero.

Nê esasî ser o ma venga pêro terefgîranê demokrasî, haştîye û wayûbiratîye danê ke vera polîtîkayanê tekperestan û qeyûman têkoşînê hemparî pîlêr bikerê. Ma venga pêro kedkar, cinî, ciwan, şar û bindestan danê ke 17ê teşrîna peyêne de mîtîngê Azadîye û Demokrasîyî yê Êlihî de vera zulmî vengê xo vejê.''