Îdîr de weçînayîşanê 2009, 2014 û 2019 DTP, BDP û HDP ser kewtî. DEM Partî wazena 31ê adare de serkewtişêkê bînî fînîno dest. Îtîfaqê AKP-MHPyî Îdîr de namzedo hempar vet û Walîyê Îdirî yê AKPyî Ercan Turan bi xo xebatanê weçînayîşî yê AKPyî rayra beno.  DEM Partî vera heme xîleyanê îqtîdarî wazena bi îtîfaqê kurd, azare û terkemeyan heme şaredarîyanê bajarî bîgêro. Namzedanê DEM Partî û şarê Îdirî ANFyî rê qisey kerd.

Namzedê DEM Partî yê Îdirî Mehmet Nurî Guneş o ke 2009 de sey namzedê DTPyî ser kewt û dima ra tepîşîya û nizdê des serran zîndan de mend, nê vatî: ''AKP sey weçînayîşanê verînan narey zî çîyo ke destê ci ra yeno keno ke îqtîdarê xo bido domnayene. Şer kerdo xorî, sîyasetmedarê ma hema zîndan de yê . Ma do 31ê adare de nê polîtîkayan rê vajê vinderê. Talanê qeyûman xora eşkera eseno. Nê weçînayîşî de bi walîyî operasyono brokratîko cîya yeno rayraberdene. Seba ke destkeweyanê ma werte ra wedarî çîyo ke destê înan ra yeno kenê. Walîyê Îdirî sey serekê AKP yê bajarî gureyeno. Rixmo ke heme evrakê ma temam bî înan waşt namzedanê ma bidê war. Bi wayîrvejîyayîşê şarî peyser geme ameye eştene. Walî vano se beno wa bibo ê do ser bikewê. Vera nê şar wayîrê DEM Partî vejîyeno la ganî ma hesabê xo zixm tepişê. Şarê  ça beno wa bibo ganî bêro sindoq ser. Kam ke îmkanê ci çîno wa xebere bido rêxistinanê ma yê bajar û qezayan ma do mesrafê înan bigêro xo ser. Semedê Îdirî zaf projeyê ma est ê,ma wazenê xizmetê şarê xo bikerê. Şar do şaredarî de bibo wayîrê qale.''

Namzede Necla Kum zî bale ante zehmetîyê ke cinîyî ancene ser û nê vatî: ''Ma do Îdir de semedê cinîyan waranê cuye hîra abikerê. Çîyo ke yê şarî ma yo, ma newera teslîmê şarî bikerê. Ma sey DEM Partî qerardar ê ke Îdir  de zaf çîyan bibedilnê. Xora pratîkê ma yo verên zî werte de yo. Qeyûm têna zirar kurdan nêda, zirarê ci yê vera şarê azarî û tereke zî eşkera yo. Ma sey DEM Partî yenê ke bibedilnê, çareser bikerê. Îdir bîyo warê rantî, ma do peynîyê nê bîyarê. Ma do bibê vengê cinîyan. Ma do wayîrê ziwan û kulturê xo bivejîyê. Ma do ziwanê xo de perwerde bidê cinî û domanan. Ma do waranê karî biafirnê. Yew rayzî semedê ma muhîm a.  Şarê Îdirî do 31ê adare de wayîrê îradeyê xo bivejîyo.''

Namzeda DEM Partî ya Aralikî Aliye Akkuş zî derheqê qazaya Aralikî de nê vatî: ''Bi seserran o şar tîya  bi kulturanê cîya cîyayan pîya sey wayûbirayî ciwîyeno.  AKP 20 serrî yo na qeza îdare keno le semedê şarî gamêke nêeşta.Şarê îqtîdarî ke nê welatî îdare keno, tîya çîk nêkerdo. Qeza bîya xirabe. Xeylêk projeyê ma est ê. Eke ma ser bikewê tîya do her çî bibedilîyo. Ma do Aralik bikerê bajarê cinîyan.''

Hemwelatîyan ra Mustafa Yaman, Ali Kemal û Mehmet Demîr zî vat: ''Rayîrê ma zî çîn ê. Qeyûman nê memletetî de mixêk zî nêkuwa. Nînan de wijdan çîn o, dizdê kenê. Ma do cewabê xo sindoqan de bidê.''