Tepişteyê Zîndanê Beşîrî yê Êlihî de Mehmet Emîn Çano (72) ke lîsteya tepişteyanê nêweşan ê ÎHDyî de cagêno, 24ê gulane de krîzê qelbî vîyart. Çam wedarîya Nêweşxaneyê Herême yê Êlihî. Gurçikê ey de kîst û mezgê ey de zî ur est ê. Hetê bînî raa tede kerrîya zî est a.

Hemserekê ÎHDyî yê Sêrtî Mehmet Nûrî Ekîncî seba Çamî şi nêweşxane de. Ekîncîyî pare kerd ke ne ê ne zî keyeyê ci nêeşkayî Çamîş bivînê.

Ekîncîyî vist vîrî ke wextê peyênî de Nêweşxaneyê Cigêrayîşî yê Êlihî raporê ''eşkeno zîndan de bimano'' dayo Çamî coka ê do muracatê ATKyî bikerê. Çamî îfade kerd ke dewlete mecbûr a tepişteyan bipawa û vat: ''Zîndanan de bi hezaran tepişteyê nêweşî est ê. Hinî taqetê înan çin o. Xeylêk tepişteyî est ê ke nêeşkenê payan ser de vinderê. Zîndanê Beşîrî de tepişteyan rê cigêrayîşê zereyê fekî yeno ferzkerdene. Tepişteyî eke ney red bikerê nênê tedawîkerdene. Bi nê hawayî tepişteyî terkê mergî yenê kerdene.

Serekkomarî cezayê vera mensubanê Darbeya 28ê Sibate efû kerdî. La heta nika seba kurdêkî/e zî na bire nêdîyaye. Ancax cenazayê kurdan zîndanî ra vejîyenê ke na rewşêka polîtîk a. Qanûnî teyna madeyan ra nênê pê. Qanûn wijdan o zî. ''