Qezaya Hezexî ya Şirnexî de doman Mîhraç Mîroglu wexto ke verê berê xo de taxa Turgut Ozalî de niştêne bîskîlete wesayîtê zîrxînî da ci ro û Mîrogluyî dinyaya xo bedilnaye. No merg reyna balî antî serebûtanê winasênan ser. 

2008 ra nata Vakurê Kurdîstanî de tewr tay 40 merdimî hetê wesayîtê zirxînî ra kişîyayî ke nînan ra 20 tenî doman bîyî. Kiştoxê înan nêameyî cezakerdene. Xora polîso ke Mîhraç kişt, vera dîya.

Wekîla HDPyî ya Şirnexî Nurane Îmîr derheqê mesele de ANFyî rê qisey kerd.

Îmîre pare kerd ke Şirnex de wesayîtê zirxînî Mûhammed û Fûrkan Yildirim, Dîren Basan (10), Sînan Saltikalp (17), Bunyamîn Bayram (6), Hakan Sarak (5), Okan Înce, Bahadir Beyazlioglû, Alî Olmez (15) kiştî. 

Îmîre ard ziwan ke polîtîkaya bêcezaverdayîşî serebûtanê winasênan zêdînena û vat: ''Herinda cezakerdişê kiştoxî de serebût yeno mîyankerdene. Keyeyê Mîhraçî muracatê Walîtîya Şirnexî kerd. Walîtîye înan rê vato 'Wesayîto zirxîn hêdî hêdî şîyêne.' Eke wina bi çira o doman 11 metreyan zît bi kewt war? Senî bîskîleta ci bîya 4-5 parçe? Tewiro ke nê serebûtî sey qeza mojneno hende kiştoxî mesuldar o. Derheqê nê wesayîtanê zirxînan de ma xeylêk reyî Meclîs de vernîyazî dayî la pêro bêcewab mendî.

Nê serebûtî dişmenîya vera kurdan nîşan kenê. Vateyê 'Cinîyî zî bê domanî zî bê çi hewce yo do bêro kerdene' yê Erdoganî pratîkê ney eşkera keno. Hînî bedelêk nêmendo ke kurdî bidê. Pê şuxilnayîşê huqûqê merdimîye, pê geşkerdişê nefretî ê do nêeşkê biresê cayêk. Ma do na babete teqîb bikerê. Polîso ke Mîhraç kişto ganî cade wezîfe ra bêro girewtene û bêro tepiştene. Polîtîkaya bêcezaverdayîşî ganî biqeda. Wesayîtê zirxînî ganî cade warê komelkî ra bêrê vetene.''