Alî Koç 1992 de Amed de tepişîyabi û bi îdîaya 'xerakerdişê yewî û yewparetîya dewlete' ci rê cezaya muebede dîyabî.

Koço ke 31 serrî yo zîndan de tepişîyeno, heta nika xeylêk reyî ame surgunkerdene û nika Zîndanê Karabukî de tepişte yo. Ganî Koç 15ê kanûna 2022yî de vera bidîyayêne la bi bira Heyetê Îdare û Çimdarîye înfazê ci amebi vêşnayene. Heyetî bi bahaneya 26 cezayanê dîsîplînî yê cîyayan nêverda ke Koç tehlîye bibo. 

Heyetî serrêke ra dima menga çeleyî de ancî rewşa Koçî ercnaye û bi heman bahane bire daye ke înfazê Koçî bêro taloqkerdene. Heyetî narey înfazê Koçî 3 mengan taloq kerd.

Koçî derheqê babete de keyeyê xo de qisey kerd û îfade kerd ke 24 zîndanan de înfazê 14 tepişteyan qedîyayo la seba ke ê poşmanîye qebul nêkenê vera nêdîyenê. Koçî venga rayaumûmîye da ke derheqê babete de hîsger biba.