Înîsîyatîfê Şarî yê Kurdîstanî pare kerd ke heta ke Rayber Apoyî reyde pêvînayîş bêro kerdene û o bi xo eşkerayîye bido, sere de cinî û ciwanî ganî pêro kurdî her ca de çalakîyan bikerê.
Înîsîyatîfê Şarî yê Kurdîstanî derheqê rewşa nedîyare ya Rayberê Şarê Kurdî Abdullah Ocalanî de eşkerayîyêke daye.
Eşkerayîye de ame vîrvistene ke 15ê adare ra nata derheqê weşîya Abdullah Ocalanî de tay şikî estê, medyaya komelkî ser o tay îdîayî yenê parekerdene û ganî cade ey reyde pêvînayîş bêro kerdene.
Înîsîyatîfî vat: ''Deynê ma yo ke ma vera rewşe tewirêk bimojnê. Rayber Apo temsîlkarê estbîyayîş û têkoşînê azadîye yê kurdan o. Heta ke Rayber Apoyî reyde pêvînayîş bêro kerdene û o bi xo eşkerayîye bido, sere de cinî û ciwanî ganî pêro kurdî her ca de çalakîyan bikerê. Pê şîarê 'ciwanî fedayîyê Rayber Apoyî yê' ganî metropolanê Tirkîya de û her ca de ma hêrişanê vera Rayber apoyî pûç bikerê.Ma venga ciwan, cinîyan û pêro şarê xo danê ke pê ruhê serkewtişê Garê vera faşîzmê AKP-MHPyî çalakîyan bikerê. Ma pê ruhê Newroze azadîya Rayber Apoyî bîyarê ca.''
