Hetkarê Hemserekanê Pêroyîyan ê HDPyî yê Komîsyonê Çapemenîye û Propaganda ra Barpirsîyar Tayîp Temelî derheqê hêrişanê vera çapemenîya kurdan de eşkerayîyêke daye.

Eşkerayîye de ame vîrvistene ke ewro pê operasyonanê sereştişî xeylêk rojnamegerê kurdî ameyî destbendkerdene û ame vatene ke îqtîdaro ke vera qels beno, keno ke pê operasyonanê îlagelan emrê xo derg bikero. Temelî da zanayene ke verî zî rojnamegerê kurdî bîyêne hedef û îqtîdarê AKP-MHPyî nê tradîsyonî teqîb keno.

Temelî vat: ''Îqtîdar nê operasyonan sey 'xebata weçînayîşî' vîneno û keno. Îqtîdar pê hedefkerdişê rojnamegeranê kurdan xîret keno ke sûcanê xo mîyan bikero. Nê îqtîdaranê faşîzanan tim kerd ke pê hedefkerdişê rojnamegeranê kurdan komelî bêveng bikerê. La xîretê îqtîdarê AKP-MHPyî veng o. Rojnamegerî sey vizêrî ewro zî do verê polîtîkayanê hêrişan de milê xo çewt mekerê. Ma nê şîdetî şermezar kenê û îfade kenê ke ma hetê rojnamegeran de yê. Ma venga pêro rayaumûmîye û rêxistinanê rojnamegerîye û çapemenîye danê ke paştî bidê nê rojnamegeran.''