Erdlerzê ke Vakurê Kurdîstanî de virazîyayî û merkezê înan Bazarcix û Elbîstanê Mereşî bî, bi hezaran însanan dinyaya xo bedilnaye û hûmara ê însanan ke binê xirban de yê, nêyena zanayene. Erdlerzî ra çend rojî vîyartî la hema zî dewlete nêeşkîyaya xo biresna zafê herêman û xirban. Şar bi xo hewl dano ke ê însanan bixelisno ke binê xirban de yê. Hukmatê tirkî roja diyine de qerar da ke halê îstîsnayî îlan bikero.

Serokwezîrê Tirk Recep Tayîp Erdogan bi eşkarayîye dîyar kerd goreyê madeyê 119î bi destûrê bingeyîn, înan qerar dayo ke Halê Îstîsnayî îlan bikerê. Erdoganî erdlerzî ra 24 saetî dima bi na eşkarayîye seba reya yewine na babete ser o qisey kerd. Coka gumanî est ê ke, bi nê qerarê Halê Îstîsnayî erdlerzî zî seba menfeatê xo bixebitnê. Seba ney;

-Rêxistinê komelî yê sîvîl û partîyê sîyasîyî yê muxalîfî teberê prosesî de manenê. Bi taybetî Mereş, Amed, Dîlok, Edene, Osmanîye, Riha, Semsûr, Meletî û Hatay de herinda hêzê wezîfedar ê dewlete de, rêxistinê komelî yê sîvîlî, partîyê sîyasîyî û şar bi îmkananê xo destpêkî ra heta nika xebityayî. La bi nê qerarê Halê Îstîsnayî teberê prosesî de manenê.

-Vernî ci ro ame girewtene ke, no proses zelal nêro rayîrberdene. Babeta resayîşê xirban û resnayîşê hetkarîyan ê seba mexdûran de gumanî est ê.

- Perîyodê eşkerayîye de yeno famkerdene ke hûmara rastên a merde û birîndaran niminenê. Seba ke hûmara rastên ê eşkerayîyanê resmîyan ra xeylê zafêr a, bi nê qerarî wazenê partîyanê sîyasîyan, merdimanê sivîlan û rêxistinanê sivîlan teberê prosesî de verdê ke rastîye nêro çiman ver.

-Wezîrê Wezaretê Derûverî, Murat Kurumî vat, ‘‘Kordînasyonê AFADî ra vêşêr ma do nêverdê kordînasyonêko bîn est bibo.’’ Û sewbîna eşkera kerd ke, hetkarîyî tena bi raya AFADî bêrê arêdayene. Seba ney zî hetkarîyî ke hetê rêxistinanê sivîlan ra seba birînanê erdlerzî ameyî arêdayene, do bêrê destserdayene.

-Hetkarîyê ke teberê welatî ra ameyî arêdayene zî, do bêrê destserdayene.

-Serdestîya AKP-MHPyî wazena nê şert û mercanê Halê Awerteyî de weçînitişêkî bikera. Coka eşkera yo ke na felaketa ke ameya şarî ser, ê do seba xo bixebitnê.