Vizêr qezaya Licikî ya Erzînganî de madenê zerdî de hezaz qewimîyabi û hema zî tay karkerî binê erdî de yê. Hemsereka Pêroyî ya DEM Partî Tulaye Hatîmogullari qezaya Licikî de warê felaketê madenî zîyaret kerd.

Hetkara Hemsereka Pêroyî ya DEM Partî ya Komîsyonê Kede ra Berpirsîyare Sevtape Akdag, Hemvervatoxa Komîsyonê Ekolojî Melîse Tantan û îdarekarê DEM Partî zî Tulaye Hatîmogullari reyde bîyî. Polîsan nêverda ke girse derbazê warê madenî bibo.

Tulaye Hatîmogullari cayêkê nêzdîyê madenî de qisey kerd û vat: ''No felaket yew qeza ney cînayetêk o. Hem şarê herême hem zî têgêrayîşanê ekolojîkan nê madenî ser o çend reyî hişyarîye dabî. La îqtîdarî nê xîretî peygoş kerdî. AKPyî rixmê nêrazîbîyayîşan zî sermayedarî pawitî. Îqtîdarê AKPyî erd û awa nê welatî pêşkêşê sermayedaran kerdî. Cuya bi hezaran merdiman çin hesibnaye. Vanê ke 9 karkerî binê erdî de yê la hûmare zelal nîya. Îqtîdarî bi peygoşîya xo morê xo da binê nê cînayetî ro.

Nika nêverdenê ke zanistî bêrê û cigêrayîşan bikerê. No serebût serebûtê Çernobîlî yo diyîn o. Awbendê Kebanî, Çemê Munzur û Firatî û Hewzaya Firatî sîyanurî ra tesîr bîyî. Îqtîdar nêeşkeno xo nê sûcî ra bixelisno. Ma do bi rayîrê mehkemeyan hesabê ney bipersê. Ganî cade no maden bêro qefilnayene û peynîya xebatanê şîrketa Anagoldî bêra ardene. Ma şarê Erzînganî ra serweşîye wazenê. Ma hetê pêro şarê ma de yê. Têkoşînê ma û paştdayîşê ma do tim dewam bikerê.''