Rixmê heme astengîyan Komployê 15ê Sibate yê vera Rayberê Şarê Kurdî Abdullah Ocalanî Îstanbul de ame protestokerdene. Rêxistina HDPyî ya Îstanbulî waşt Meydanê Şîrînevlerî de eşkerayîye bido la polîsan destûr nêda.

Hemserekê HDPyî yê Îstanbulî Îlknure Bîrol û Ferhat Encu, wekîlê HDPyî Musa Pîroglu û Mehmet Ruştu Tîryakî û Hemserekê KCDyî Berdan Ozturk  yê ke tewrê çalakîye bîye  vera qedexeyî nêrazîbîyayîş mojna. Polîsanê ke wekîlî girewtî binê ablûqa rojnamegerî zî warê çalakîye ra fînayî dûrî ke wa dîmenan meancê.

Rixmê heme qedexeyan şar bi slogananê ''Biciwîyo Rayber Apo'', ''Îmraliyî rê hezar selamî'' û ''Biciwîyo xoverdayîşê zîndanan'' Meydanê Şîrînevlerî ra ver bi banê HDPyî rayra şi. Tîya eşkerayîye ameye dayene.

Îlknure Bîrola ke tîya qisey kerd vat: ''Ma zîhnîyetê qedexeyan qebûl nêkenê. Ma na bêhuqûqîye qebûl nêkenê. Heqê azadîya îfadeyî yê heme hemwelatîyan û partîyan esto. Heqê ma yeno binpaykerdene. Bi caardişanê faşîzanî heqê ma yê îfadeyî ame xespkerdene. Seba ke ma nê teşhîr bikerê ma eşkerayîye nêdanî. Ma tîya ra reyna veng danê senî ke ê zulmkarê verênî bin kewtî şima zî do bin bikewê.''