DEM Partî bi şîarê ''Ma do Rayîr Nêdê Darbeya Qeyûman'' qezaya Esenyurtî ya Îstanbulî de vera destsernayîşê Şaredarîya Colemêrgî çalakîyêke kerde. Çalakîye de pankartÊ sey ''seba şiknayîşê tecrîdî, seba azadîye vengê xo berz bikerê'', ''Şaredarîye yê ma ya'' ameyî akerdene û sloganê sey ''"Bijî berxwedana Colemêrgê", “Qeyûm biçe”, "Em ê bi berxwedanê bi ser bikevin" û "Jin jîyan azadî" ameyî vatene.

Hemserekê DEM Partî yê Îstanbulî Murat Kalmazî çalakîye de dîyar kerd ke ê hişmendîya destsernayîşî qebul nêkenê û vat: ''Ganî her kes wayîrê şaredarîya xo vejîyo.''

Wekîla DEM Partî ya Dêrsimî Aytene Kordu zî pare kerd ke ê do verê polîtîkayanê teda yê hukmatî de sereyê xo nêarê war. Aytene vat: ''Ma sey Seyîd Rizayan xo ver bidê û têkoşîn bikerê.''

Serekê CHPyî yê Dêrsimî Huseyîn Ergînî ard ziwan ke destsernayîşê îradayê şarêkî sûcê vera merdimatîye yo.

Hemserekê Kongreya Demokratîke ya Şaran (HDK) Cengîz Çîçekî da zanayene ke îqtîdarê AKP-MHPyî xîret keno ke rejîmê tekcamêrdî awan bikero. Çîçekî vat: ''Faşîzm komanê rêxistinkerdeyan ê sey Gezî û Kobanê ra terseno. Ganî ma soz bidê yewbînan û xo rêxistin bikerê. Mesele teyna qeyûm nîyo; polîtîkaya şerî tim kurdan rê yena ferzkerdene.''

Hetê bînî ra polîsan hêrişê girseyî kerd û çend kesî destbend kerdî. 

Çalakîye bi rayraşîyayîşê ciwanan qedîyaye.