Pawitoxê heqan Şubeyê Îstanbulî yê Komeleya Heqanê Merdiman (ÎHD) de ameyî pêser û derheqê şîdeto ke nê rojan de zêde bi de deklarasyonêk eşkera kerd. Temsîlkarê Îstanbulî yê Waqfa Heqanê Merdiman ê Tirkîya (TÎHV) Umît Efe, Şanar Yurdatapan, rojnameger Tugrul Eryilmaz û Murat Çelîkkan û zaf temsîlkarê rêxistinanê heqanê merdiman tewrê kombîyayîşî bîyî.

Rojnameger Murat Çelîkkanî vat: "Tirkîya seba rojnamegeran û hêzanê demokratan sey zindanêk a. Akademîsyenê Haştîye û pawitoxê heqanê merdiman sey hedef yenê girewtene. Têna serra 2017î de hûmara kesanê ke bi terorî ameyî sucdarkerdene 50 hezar ra zêdêr a. Nê hêrişî aslê xo de vera pawitoxanê heqanê merdiman yenê kerdene."

Sekretera Şubeyê Îstanbulî ya ÎHDyî Lemane Yurtsever zî qisey kerd û vat: "Berpirsîyarîyê peymananê heqanê merdiman nênê caardene û serranê peyênan de vera pawitoxanê heqanê merdiman teda û hêrişî bîyî zêde. Zaf pawitoxê heqanê merdiman bi îdîayanê bêbingeyînan rastê destbendkerdişan, tehqîqatan, hukmkerdişan, gefan ameyî. Ma yê ke îmzakerê na kampanya yê reyna anê ziwan ke pawitişê heqanê merdiman heqêko unîversal o. Ma hêrişê vera pawitoxanê heqanê merdiman şermezar kenê û wazenê ke cade nê hêrişî bêrê vindartene. Ma parê kenê ke ma do bibê taqîbkerê nê waştişê xo û bi nê armancî ma Torra Paştdayîşî ya Pawitoxanê Heqanê Merdiman  (Solidarity Network for Human Rights Defenders — Turkey) awan kerde."

Dezgehê Vengdayoxî yê Torra Paştdayîşî nê yê: Şubeyê Rêxistina Efûyî yê Tirkîya, Civil Rights Defenders, Komeleya Muşahede ya Seba Heqanê Têdûştan, Merkezê Vîrê Edalet û Rastîye, Komeleya Înîsîyatîfêr Heqan, Komeleya Heqanê Merdiman, Komeleya Rojdemê Heqanê Merdiman, Kaos GL, Komeleya Xebatanê Huqûqî û Medya, Komeleyanê Cigêrayîşanê Waran ê Sivîlan, Waqfa Heqanê Merdiman a Tirkîya, Komeleya Cuye, Vîr û Azadîye, Komeleya Hemwelatîye.