Îstanbul de bi rayraşîyayîşêkê girseyî destsernayîşê Şaredarîya Colemêrgî ame protestokerdene. Polîsan hêrişê rayraşîyayîşî kerd la rixmê ney zî girseyî bi sloganê ''Ma dizdî û faşîzmî qebul nêkenê'' çalakîye kerde.
Qezaya Sancaktepe ya Îstanbulî de serkêşîya Hêzanê Kede û Demokrasîyî û DEM Partî de vera destsernayîşê Şaredarîya Colemêrgî rayraşîyayîşêk ame kerdene. Rayraşîyayîş de bêmabên sloganê sey Bijî berxwedana Colemêrgê” û “Em ê bi berxwedanê bi ser bikevin” ameyî vatene.
Cadeyê Demokrasîyî de polîsan waşt ke girseyî asteng bikerê la girseyî xîretê polîsan pûç kerd. Polîsan nêzdîyê 20 kesî destbend kerdî.
Qezaya Beşîktaşî ya Îstanbulî de zî çalakîya roniştişî ameye kerdene. Serekê CHPyî yê Beşîktaşî Alîcan Şen zî tewrê çalakîye bi û vat: ''Çinhesibnayîşê îradeyê şarêkî nêno qebulkerdene. Ez seba paştdayîşî ameya tîya.''
Îdarekarê DEM Partî yê Beşîktaşî Ferah Kokmenî vat: ''Tirkîya de vera demokrasîyî darbe ameye kerdene. Ma do bêmabên çalakîyanê xo rê dewam bikerê.''
