Îstanbul de merdimanê tepişteyan serkêşîya MATUHAYDERî de çarçewaya hemleya ''Abdullah Ocalanî rê azadîye, meseleya kurdan rê çareserîya sîyasîye'' de Nobeta Edaletî daye destpêkerdene. Nobete banê DEM Partîye yê Bagcilar de bi eşkerayîya çapemenîye dest pêkerde.

Xeylêk merdimê tepişteyan, dayîkê ke Nobeta Edaletî tepişenê, MATUHAYDER, Hemserekê Dem Partîye yê Îstanbulî Gonca Yango û Murat Kalmaz, endamê SYKP û ESPyî û xeylêk kesî tewrê eşkerayîye bîyî.

Murat Kalmazî ke tîya qisey kerd ard ziwan ke rojemê înan o verên grevê vêşanîye yê zîndanan o û vat, '' Heta ke tecrîdê Îmraliyî mero wedaritene şer zî nêqedîyeno, coka genî vera tecrîdî her kes vengê  xo berz bikero.''

Dima ra dayîkanê ke nobete tepişene ra Fince Akman qisey kerd. Fince Akman vist vîrî ke îqtîdarê AKP-MHPyî tecrîd xorî kerdo û vat, ''Ma coka ma dest pê Nobeta Edaletî kerd.  Heta wedaritişê tecrîdê serê Rayberê ma çalakîyê ma do dewam bikerê. Tecrîdê serê Birêz Abdullah Ocalanî tesîrê domananê ma yê tepişteyan zî keno. Tecrîd zaf giran o. Domanê ma şehîd benê. Hema newe di şehîdê ma zîndan ra vejîyayî. Coka ma veng danê ke wa her keso wayîrê wîjdanî bêro tîya.''

Çalakwanan ra Kumru Akgul zî vist vîrî ke 33 aşmî yo Ocalanî ra xebere nîna girewtene û veng da CPTyî ke wa wezîfeyê xo bîyaro ca. Kumru Akgul vat ê do heta dalpaya peyên a gonîya xo têkoşîn bikerê û semedê wayîrvejîyayîşê çalakîye veng da.

Çalkawana Nobeta Edelatî Cemile Karakaş waşt wa tecrîdê serê Abdullah Ocalanî  û tepişteyan bêro wadaritene û veng da ke wa her kes berpirsîyarîya xo bîyaro ca.

Dima ra Hemsereka MATUHAYDERî Dîleke Demir Metnê çapemenî wende. Eşkerayîye de bale ameye antene tecrîdê Îmraliyî û muhîmîya rolê Abdullah Ocalanî ser û ame vengdayene ke wa her kes vera tecrîdî vengê berz bikero û wayîrê grevê vêşanîye yê tepişteyan bivejîyo.

Nobeta Edaletî do her roje mabênê saetanê 11:00-17:00 banê DEM Partîye yê Bagcilar de bêra kerdene.  Reyna do çalakîye her hîrê rojan de adresanê cîya cîyayan de bêra kerdene.

Hetê bînî ra Amed, Wan, Adana û Mersin de zî çalakîyê edaletî dewam kenê.