Înîsîyatîfê Paştdayîşê Tepişteyan waşt bi şîarê ''Tepişteyanê nêweşan rê azadîye''verê Dezgehê Tibê Edlî  (ATK) yê Yenibosnayê Îstanbulî de eşkerayîye bido. Polîsan bi bahaneyê qedexeyê çalakîyan waşt çalakî asteng bikerê.

Polîsan dormeyê ATKyî girewt binê ablûqa. Wekîlê HDPyî Omer Faruk Gergelîogluyî vera astenkerdişî hersê xo ard ziwan û vat eşkerayîya çapemenîye heqêko qanûnî yo. Gergerlîogluyî  amîrê polîsan ra vat: ''Hema ke to nêzanayêne qanûn çîyo mi ders dayene.''

Merdimanê tepişteyan rixmê astengkerdişê polîsan dovîzê ''Wa tepişteyê nêweşî bêrê veradayene'' û ''Tecrîd mirneno paştdayîşî dano ciwîyayene'' akerdî û eşkerayîye daye. Merdimanê tepişteyan vat: ''Domanê ma mirenî. Yew menge de 7 cenazayî zîndanan ra vejîyayî. Ma do destûr medê hinî domanê ma zîndanan de bimirê.'' Polîsan dormeyê çalakwanan girewt û rojnamegerî warê çalakî ra vetî.