Mehlaya Yamanlar a ke qezaya Karşiyaka ya Îzmîrî de ya nê saetanê sibayî de dês û berê şeş keyeyanê Kurd û Elewîyan ameyî nîşankerdene. Dimayê nê qewimîyayîşî ra mehlayijan polîsan rê gêrayî. Gama ke polîs ame tena zabitname girewt û serê nîşanan boyax kerd û naye ra şarê mehla reaksîyon da.

Parlamenterê Partîya Şaran a Demokratîke (HDP) Mûrat Çepnîyo ke şi cayê qewimîyayîşî şar zîyaret kerd.

Îdarekaro verên ê HDP’yî yê qeza Huseyîn Akgulî zî vat ke mehla de Meraşijî û Elewîyî ciwîyenê û vat “No hedef ramotiş o.  Ma cimatêk ê û ê nêwazenê nê bivînê, qebûl bikerê. Elewîyanê nê welatî bi serran o nê çîyan ciwîyenê. Wazenê ke ma bitersnê. 10 rojî verî grûbêka AKP’yî ameye mehla de broşur kerd vila û reyî waştî. Ma vat ‘reya ma ya ke ma bidê AKP’yî çina.’ No waştişê ma yo tewr xozayî yo. Ma ûca no reaksîyon ramot û dima ra no qewimîyayîş virazîya. Halbu ke tu problemê ma çewî dir çino. Ma tîya yê û ma nêtersenê.”

Parlamenterê HDP'yî Mûrat Çepnî zî ard ziwan ke ganî kerdoxê qewimîyayîşî tavilî bêrê dîyayene. Çepnîyî qiseykerdişê xo wina domna: “Tavilî çi lazim o ganî bêro kerdene. Eke ê nêkerê û na babete ser o nêvinderê ê zî benê perçeyêkê nê provokasyonî.”