Îzmîr de vera tecrîdê serê Rayberê Şarê Kurdî Abdullah Ocalanî û polîtîkayanê şerî çalakîya protestoyî ameye kerdene. Polîsanê tirkan hêrişê çalakîye kerd û tewr tay 50 kesî destbend kerdî.
Kongreya Demokratîke ya Şaran (HDK), Têgêrayîşê Cinîyan ê Azadan (TJA), DBP, HDP, Hêzanê Têkoşînê Yewbîyayeyî (BMG) û EGE TUHAY-DERî Meydanê Konakî de çalakîyêka protestoyî kerde. Çalakîkeran waşt ke tecrîdê Îmraliyî û şer biqedo.
Polîsan dormeyê çalakîkeran girewt û hêrişê înan kerd. Polîsan tewr tay 50 kesî bi îşkenceyî destbend kerdî. Rixmê ney zî girseyî vera sloganî eştî. Ciwanan vera hêrişê polîsan nêrazîbîyayîşê xo mojna û sloganê 'Rûmetê merdimatîye do îşkence bin bikero' vat.
Ciwanan pankarta 'Ma do faşîzmî birijnê, tecrîdî bişiknê' akerde û ver bi Meydanê Konakî şîyî. Polîsan tîya de zî ciwanî bi îşkenceyî destbend kerdî. Hêrişê polîsan de ciwanê bi nameyê Hogir Kaya xo ra şi û wedarîya nêweşxane.
Ciwanê ke ameyê destbendkerdene do bêrê berdene bi Mudirîya Polîsan a Çanakkale.
Hetê bînî ra polîsan nêverda ke wekîlê HDPyî Serpîle Kemalbay û Feleknase Uca Meydanê Konakî de eşkerayîye bidê. Rojnamegerê ke çalakîye teqîb bikerê meydanî ra ameyî dûrvistene.
Çalakîye de Hemserekê HDPyî yê qezaya Bodrumî Mehmet Zahîr Yaşar (55) zî hêrişê polîsan de ame destbendkerdene. Hêrişî ra Yaşar krîzê qelbî vîyart û wedarîya Nêweşxaneyê Perwer û Cigêrayîşî yê Ataturkî. Yaşarî rê anjîyo ame kerdene û o servîsê ciewnîyayîşê giranî de tepişîyeno. Wekîlê HDPyî Serpîle Kemalbay û Feleknase Uca seba ke rewşa Yaşarî bipersê şîyî nêweşxane.
