Amed de çend şino şuxulnayîşê madeyê kungkerdişî zêdîyeno. Mehleyanê feqîran de şuxulnayîş û rotişê madeyê kungkerdişî bale aneceno xo ser ke talebeyê dibistane zî şuxulnenê.

Hemserekê DEM Partî yê Amedî Abbas Şahînî derheqê babete de qisey kerd. Şahînî ard ziwan ke rîyê şerî û problemanê komelkî ra bazirganîya narkotîkî zêdîyaya û nê vatî: "Ma xora na rewşe serranê 90yan ra zanê. Ma  2015î ra nata prosesêkê giranî ra ravîyarenê. Îqtîdar keno ke bi rayîrê trafîkê narkotîkî hem fînasorîye peyda bikero hem zî ciwanan pazîfîze bikero.

Trafîkê narkotîkî Tirkîya ser o beno.  Bitaybetî Kurdîstan de seba ke ciwanê ma warê sîyasîyî ra bêrê dûrîfînayene û bêameyoxî bêrê verdayene no metod ame ceribnayene. No rayîrêko bitehluke yo. Peynîya nê rayîrî de hem sîstem kewt hem zî ameyoxê ciwananê ma bi tarî. Seke yeno zanayene 2014 de planê çokdayîşî vejîya werte. Bi nê planî ame waştene ke sîyaseto demokratîk wa bêro tesfîyekerdene, şarê kurdî bêstatuyî bêro verdayene, ciwanî sîyasetî ra bêrê dûrîfînayene. Ame waştene ke wa bajarî bêrê rijnayene şar bibo multecî. Bitaybetî coğrafyaya Kudîstanî de ciwanê ke bi tarikat û cemeatî nêeşkayî  qezenc bikerê şawitî teberê welatî û ciwanê ke mendî vera înan polîtîkaya narkotîkî fînaye dewre. 

Ewro çi heyf ke serrê şuxulnayîşê narkotîkî heta heşt ameyî war. Ciwanê ke verî bi huner, edebiyat û perwerde eleqedar bî nika bêameyox ameyî verdayene, pasîfîze bîyî û verê xo dayo narkotîkî. Kurdîstan de polîtîkaya şerî zixme est a. Wextê prosesê çareserîye de Amed de şuxulnayîşê narkotîkî hema hema qedîya. Pîya bi planê çokdayîşî reyna zêdîya. Qeyûman têna îrade xesp nêkerd polîtîkaya îmhayî rayra berde. Îqtîdar na babete zanaye na polîtîka rayra beno. Ma zî do nê teşhîr bikerê. Ma senî ke şaredarîyê xo peyser girewtî ma do waranê neweyan biafirnê û ciwananê xo zî narkotîkî ra bixelisnê."