Hemserekê DEM Partî yê Amedî Abbas Şahînî ard ziwan ke Dewaya Kobanê seba qedînayîşê têgêrayîşê kurdan xîretêk o û vat ke ê do gamêke zî apey nêerzê. Şahînî vat: ''Ganî no sîstem bêro rijnayene. Heta tecrîd nêqedo demokrasî do nêro welatî.''
Hemserekê DEM Partî yê Amedî Abbas Şahînî birê Dewaya Kumpasî ya Kobanê ANFyî rê ercnayî.
Şahînî vist vîrî ke wexto ke DAÎŞî 2014 de hêrişê Kobanê kerdbi kurdî reya verêne yew bibî û pîya têgêrabî. Şahînî îfade kerd ke netîceya nê têkoşînê demokratîkî de zî DAÎŞ amebi binvistene.
Şahînî da zanayene ke bi biranê Dewaya Kobanê qedînayîşê sîyasetê kurdan yeno armanckerdene. Şahînî vat: ''Dima ke DAÎŞ ame binvistene, na dewa bi destê îqtîdarî sey qesasî ameye akerdene.''
Şahînî pare kerd ke bi Dewaya Kobanê meşrûtîya têgêrayîşê kurdan ameya hedefkerdene û vat: ''Îqtîdarê AKP-MHPyî seba qedînayîşê têgêrayîşê kurdan xebatanê hîrayan keno. La şarê kurdî qetî têkoşînê xo rê fek vera nêdano. Cezayê ke dîyayê kurdan huqûqî nîyê. Seba xerakerdişê meşrûtîya têgêrayîşê sîyasetê kurdan na dewa ameye akerdene. Ma her roniştiş de dî ke na dewa dewayêka huqûqîye nîya.
Coka her kes pabeyê ci bi ke na dewa ra cezayî vejîyê. Şarê kurdî vera biran nêrazîbîyayîşê xo mojna la waştişanê xo yê demokratîkan ra zî fek vera nêda. Ma hertim vat; heta ke meseleya kurdan bi demokrasîyî çareser nêba û sîstemê tecrîdî yê Îmraliyî nêro wedaritene demokrasî do nêro nê welatî.''
