Hemserekê DEM Partî yê Amedî Abbas Şahînî derheqê asayîşê sindoqan û bêusûlîyanê muxtemalan ê weçînayîşanê 31ê adare de ANFyî rê qisey kerd. 

Şahînî îfade kerd ke nê weçînayîşê herêmîyî zaf krîtîk ê û vat: ''Şarê ma Newroze de na raştîye mojnaye. Seba ke rejîmê qeyûman bişawê ma hê xebitîyenê. Hişmendîya ke îradeyê kurdan bi qeyûman xesp kena, do pêro rayîran biceribna û hîleyan bikera.''

Şahînî bale ante ser ke îqtîdarê AKP-MHPyî xeylêk cayan de bi hawayêkê bêusûlî weçînitoxî qeyd kerdê û vat: ''Hezro de 2 hezar û 800 hêzê artêşa tirke sey weçînitoxan qeyd bîyê. Cayanê bînan de zî xîretê winayênî est ê. Şarê ma na babete de hîna hişyar bîyo. Sîstem nêwazeno ke kurdî sîyasetê demokratîkî bikerê. Ma derheqê asayîşê sindoqan de xebatê xo qedînayî. Amed de 3 hezar û 975 sindoqî est ê. Ma tîya ra venga yew mîlyon û 164 hezar û 165 weçînitoxanê Amedî danê ke şorê hem rayanê xo bidê hem zî wayîrê sindoqan vejîyê. Çunke tîya de reqabetê vera îqtîdar û muxalefetî ney reqabetê kurdan ê vera dewlete est o.''

Şahînî vist vîrî ke vera kurdan 8 serrî yo Planê Çokdayîşî yeno caardene la wayîrê nê planî hê çok danê. Şahînî vat: ''Sîstemê qeyûmî texrîbatê cidîyî viraştî. Ciwanê ma nê 8 serran de musayî madeyanê tîryakî. Ma zanenê ke nê polîtîkayî seba ke tewirê welatperwerî yê şarê ma bêro astengkerdene yenê caardene. Şarê ma hol zaneno ke senî wayîrê sindoqan vejîyo. Ma zî şarê xo ra ney wazenê.''