Hemserekê MAF-DADî Mahmut Şakarî  derheqê tecrîdê serê Rayberê Şarê Kurdî Abdullah Ocalanî ANFyî rê qisey kerd. Qiseykerdişê Şakarî qismêk wina yo:

“ Ma bi tecrîdê kronik û xorîyî rî bi rî yê. Eke ma yew di pêvînayîşanê 2019î mehesebnê eslê xo de 11 serrî yo Birêz Ocalanî nêeşkeno avûkatanê xo dir pêvînayîş bikero. Tecrîd têna pê merdiman û avûtanê ey sînordar nîyo. Pêvînayîşê telefonî, mektubî rojname, kitab çîyê winayên zî qedexe yê. Nêeşkeno heqê xo yê pawitişî bişuxulno. Tecrîd zaf total, xorî yo. Ziwanê huqûqê mîyannetweyîyî de no sey ‘incommunicado’ yanî qetî bêtekîlîye semedê na rewşe yeno şuxulnayene. Qet yew xebera ma çîn a. Ma nêzanê ûca de yo ya nê. Tabloyêka zaf giran a ke huqûqo ke nê îzah bikero nêameyo îcadkerdene. Tirkîya de tay dezgehan çimê xo Îmraliyî rê qefilnayî. Înan vat qey tecrîd têna Îmrali de maneno la ewro heme welatî ra vila bîyo. Seba ke înan wextî de vera tecrîdî vengê xo nêvet ewro pêro zîndanan de no sîstem yeno cakerdene. Dezgehê mîyanneteweyîyî xora sey leteyêkê komployî vernî ra înşayê Îmraliyî de ca genê. Birêz Ocalanî tim vatêne ‘Hela ke ez newe ameya heyetêk sey temsîlkarê Konseya Ewropa ame tîya cipersayîş kerd û destur da.’ Komployê mîyanneweyîyî zî û sîstemê Îmraliyî zî têna hetê Tirkîya ra nêameyî kerdene. Eke CPT û mekanizmaya mîyanneteweyîyî nêeşkenê keye, avûkat û rayapêroye rê vajê Birêz Ocalan ciwîyeno ya nê, yew qiymetê înan çîn o.

Birêz Ocalan ronayox û rayraberdoxê têgêrayîşê sîyasîyî yê kurdan o. Temsîlkarê tarîxê 50 serran ê sîyasîyan o. Hetê ci yê huqûqî û heqanê merdiman bibê zî na mesele eslê xo de meseleyêka polîtîk a. Ganî sey leteyêkê Kurdîstanî bêro vînayene. Coka sîstemê Îmraliyî û atmosfero ke Birêz Ocalan tede yo têna ey û merdiman û avûkatanê ey eleqedar nêkeno. Na mesele heme muxatapanê meseleya kurdan eleqedar kena. Yanî heme şarê Kurdîstanî eleqedar kena. Dewlete zî xora wina nêzdî bena. Polîtîkaya dewlete ya vera Îmraliyî eşkera ramojnena a mesele wina vînena. Birêz Ocalan ho zere de la mîyanê sîyasetê kurdan de yo. Wextê muzakereyan de cade teber de zî rewşe bena hole. Xora dewlete vînena ke senî tesîrê ey kurdan ser est o û sîyasetê xo goreyê ci bewlî kena.  Ganî şarê kurdî têna semedê Birêz Ocalanî nê semedê azadîya xo zî vera tecrîdî vejîyo. Şarê Tirkîya zî ganî bivînê ke sîyasetê tecrîdî welat ardo çi hal. Xora şarê kurdî roja verêne ra komplo qebul nêkerd û vera ci vejîya. Semedê şiknayîşê tecrîdî ganî dahîna sîstematîk û biîstîkrar têkoşîn bêro xurtkerdene. Beşik rojdemê kurdan giran o. Vera gerîlayan çekê kîmyewîyî yenê şuxulnayene, Rojawan binê tehlukeyê pîlî de yo, HDP û heme tepişteyê sîyasîyî bine tehlukeyî de yê la merkeze nê pêrone de tecrîd est o. Ma sey şarê kurdî prosesê krîtîkî ra ravêrenê. Ganî ma têkoşînî xurtêr bikerê. ”