Avûkat Mahmut Şakarî sîstemê Îmraliyî û polîtîkayê şerî yê îqtîdîdarî ANFyî rê ercnayî. Şakrî vat sîstemê Îmraliyî sey modelêk heme Tirkîya ra vila beno.

Mahmut Şakarî wina qisey kerd: ''Tirkîya sîstemê Îmralîyî sey modelêkî heme Tirkîya ra vila kerd. Semedê Abdullah Ocalanî roja verêne ra tay caardişe huqûqî yê taybetî estê ke ma înan sey Qanûnê Ocalanî name kenê.  Na rewşa îstîsnayî ya ke 22 serrî yo  Îmrali de yena caardene 2015-2016 heme Tirkîya ra vila bîye. Cezaya muebedî ya girane sey lete lete caardişê cezaya îdamî ya. Abdullah Ocalan hukmwerdeyo verên ê cezaya muebedê giranî yo. Nika no sey sîstemêkî vila beno. Sîstemo ke şexsê Ocalanî de afernaye bi sebebê cezagirewtişê bi hezaran tepişteyanê sîyasîyan.

Muebedê giranî de tehlîyeyo bişert çîn o. Heta peynîya emrî dewam keno. No model badê Ocalanî dosyayanê Kaytan, Boltan û Gurbanî de ame caardene û nê dosyayî kirişîyayî rojdemê Mehkemeya Heqanê Merdiman ê Ewropa (MHME). La no sîstemê ceza bi nê dosyayan sînordar nîyo, bi desan belka bi hezaran dosyayî wînayênî estê. MHME 2014 de seba ke hêvîya tehîlye 'heqê hêvîye' çîn a, no sey îşkence û muameleyê xirabî hesibna û dosyaya Ocalanî de Tirkîya mehkum kerd û dima ra derheqê hîrê dosyayanê bînan de zî eynî qerar ame girewtene. Seba ke Tirkîya qerarê MHME nêardî ca Komîteya Wezîran ê Konseya Ewropa  badê 7 serran qeraro newe girewt.

Rewşa îstîsnayî ya ke 2016 de ameye îlankerdene heme Tirkîya ra vila bîye û Tirkîya açarya hukmetêkê şerî. Rejîmê Tirkîya bîyo rejîmê şerî. Prosesê ke bi tecrîdê Ocalanî dest pêkerd heta rijnayîşê bajaranê Kurdîstanî, qirkerdişan û îşxalî dewam kerd û Tirkîya fîna mîyanê krîzî.  Eke tecrîd bêro wedaritene û problemê cezaya muebedî û problemê bînî ê zîndanan bêrê çareserkerdene, krîzê Tirkîya zî yena çareserkerdene. Rejîmê AKP-MHPyî krîz aferneno, şer aferneno, şîdetî aferneno. Rixmê qeraranê MHME wazeno sîstemê xo bidomno. Vera nayî têkoşîn hewce keno. Sebebê heme probleman sîsyasetê îqtîdarî yo. Heme problemî eşkenê bi têkoşînê kolektîfî bêrê çareserkerdene. Eke wina mebo sere de kurdî heme şarî do zafêr zirar bivînê.''