Amedsporo ke Koma Sûre ya Ligê Diyênî ya Federesyonê Futbolî yê Tirkîya (TFF) de têkoşînê şampîyonî dayene, no hewte sahaya Somasporî de semedê şampîyontîye kay kerd. Maçê ke saete 15:00 de dest pêkerd, dewreyê ci yê verênî de gole çînêbî.

Dewrê diyênî de Amedspor deqaya 49. de bi gola Oktay Aydinî 1-0 kewt vernî. Maçî de gola bîne nêameye eştene û Amedspor ser kewt.

Amedsporo ke pûanê xo resnayî 80yî û bi şampîyon, hewteyê verê ma de do sahaya xo de Menemensporî reyde kay bikero.Amedspor vera Menemensoprî bin bikewo zî bi avantajê golanê xo do bibo şampîyon.

Badê serkewtişê Amedsporî kuçeyê Amedî açarîyayî festîvale. Şarê Amedî vejîya waran û bi fîşeganê hewayî û konvoyê wesayîtan serkewtişê takimê xo pîroz keno. Kuçeyanê Amedî de vengê qornaya wesayîtan, tîlîlîyan û deyîra “Diren ha Diyarbêkir diren” beno berz. Xeylêk nuqtayanê bajarî de konvoyî tûr erzene ke zafîya cinîyan bale ancena xo ser.