Avûkatanê Buroyê Huqûqî yê Şarî (HB) Ebru Tîmtîk û Aytaç Uysal ê ke rîyê îtîrafkerêkî ra înan rê cezaya girane dîyaye, pê waştişê hukmê edîlî dest pê rojeyê mergî kerd. Tîmtîke 150 rojan ra nata û Unsal zî 119 rojan ra nata rojeyê mergî de yê. Avûkate Seda Şaraldi 29ê gulane de Zîndanê Sîlîvrî de Tîmtîke zîyaret kerde û pare kerd ke Tîmtîke tewr pêyene 46 kîlo bîye la nika seba ke nêeşkena wurza xo bipeyma nêzanena çend kîlo ya. Seda Şaraldi vat fekê Tîmtîke de birînî vejîyayî, fekê ci xiwa beno, mil û sereyê ci dejenê.

Seda Şaraldi da zanayene ke rixmê prosesî zî moralê Tîmtîke baş o û xo ver dana û vat: ''Ebru vat heman tehqîqatî de xeylêk merdiman rê dewa ameye akerdene la cezaya verêne dîyaye avûkatan ke çimê her kesî wa biterso.''

Birayê Tîmtîke Barkin Tîmtîjî û avûkate Oya Aslan ê ke Ebru Tîmtîk reyde heman dewa de yenê hukmkerdene, 10ê gulane ra nata grevê vêşanîye de yê. Seda Şaraldi îfade kerd ke Barkin waya xo reyde heman hucreyî de yo. Seda Şaraldi ard ziwan ke ganî waştişê avûkatan cade bêrê caardene.

Seda Şaraldi eşkera kerd ke rewşa Tîmtîke her roje bena giranêr û sere de muxalefet venga her kesî da ke wayîrê avûkatan bivejîyê.