hêrişê îşxalî yê dewleta tirke yê vera Rojawanî dewam kenê. Hêrişan de warê cuye yenê hedefgirewtene û sîvîlî yenê qetilkerdene. Vakurê Kurdîstanî û Tirkîya de hêrişê îşxalkî ameyî şermezarkerdene.

Peyasê Amedî de şar Parka Rojawanî de ame têhet û hêrişî protesto kerdî. Pîya Wekîla Partîya Çep a Keske Halide Turkoglu xeylêk temsîlkarê partîyanê sîyasîyan û rêxisitinanê komelê sîvîlî tewrê çalakîye bîyî. Polîsan parke girewte binê ablûqa û destûrê çalakîye nêda. Naye ser o şarî bi çalakîya roniştişî hêrişî protesto kerdî.

Dêrsim de zî endamanê Platformê Kede û Demokrasîyî waşt vera hêrişan Meydanê Seyîd Rizayî de eşkerayîye bidê. Polîsan hêrişê çalakwanan kerd û hemserekê HDPyî yê bajarî Nazli Çelik û Ferhat Yildiz, Hemşaredarê Pêrî Orhan Çelebî yo ke herinda i qeyûm ame cakerdene, Serekê EMEPî yê Dêrsimî Ergun Tekin, Çagdaş Bagaç, Ender  Şîmşek, Ali Bozkurt û Hidir Yildiz destbend kerdî.

Wekîla Dêrsimî Aytene Kordu hetê polîsan ra gerîyaye binê ablûqa. Aytene Korduya ke vera hêrişê polîsan hêrsê xo ard ziwan vat, "Heta ke çareserî bêro Rojhelatê Mîyanênî ma do vengê xo berz bikerê. Şerî de şaro sîvîl yeno qetilkerdene, ma vera nê yê. Şerî de bedenê cinî yo rut yeno teşhîrkerdene, ma vera nê yê. Ganî ambargo bêro wedaritene û verê qirkerdişê kurdan bêro girewtene." 

Riha de zî hetê DBP, HDP û Partîya Çep a Keske ra semedê protestokerdişê hêrişan çalakîye ameye kerdene. 15 ciwanê enternasyonalîstê ke semedê tewrbîyayîşê kongreya Partîya Çep a Keske ya ke do 15ê teşrîna verêne de bêro kerdene, welatanê cîya cîyayan ê Ewropa ameyî, ê zî tewrê çalakîye bîyî. Polîsan hêriş kerd û 15 ciwanê enternasyonalîstî bi kelemçeyanê peykîyan destbend kerdî.

Wekîla Partîya Çep a Keske Dîlane Kunt Ayan zî tede şar gerîya binê ablûqa. Şarî bi slogananê “Bijî berxwedana Rojava” nêrazîbîyayîş mojna.Polîsan bi cop û gazê îsotî hêriş kerd.Endamê Meclîsê Ciwanan ê Partîya Çep a Keske Livan Orman, Senem Eriş, Sadullah Bircan û Mizgin Çiftçi bi derbkerdişî ameyî destbendkerdene. Rixmê hêrişê polîsan Dîlane Ayan hêrişê vera Rojawanî şermezar kerdî.

Reyna Wan, Şirnex, Êlih, Mêrdîn, Mersin, Adana û xeylêk bajaranê bînan de zî hêrişê vera Rojawanî ameyî şermezarkerdene û semdê wayîrvejîyayîşê şarê Rojawanî ame vengdayene. 

Hetê bînî ra Agirî, Mûş, Qers, Îdir de zî eşkerayîye çapemenîye hetê polîsan ra ameyî astengkerdene.

Mûş de hêrişê polîsan de Hemserekê DBPyî Selamettin Yilmaz, Hemsereka HDPyî ya Mûşî Bermale Nergiz, Endamê Heyetê Rayberdişî yê Partîya Çep a Keske Îbrahîm Boz, edanê Heyetê Rayberişî yê HDPyî yê Mûşî Çiçek Tutuş, Omer Koç û Umit Gokturk,endamê Meclîsê Ciwanan Maruf Çelikel, Serhat Dursun kesê ko nameye ci nêame musayene ameyî destbendkerdene.