Parlamentera DEM Partî ya Wanî Gulcane Kaçmaz Sayyigit vist vîrî ke şarê Wanî cuwa ver zî vera cedhkerdişê qeyûmî cewabo xurt da û vat do vera xespkerdişê îradeyî têkoşîn bi hewayêkê qerardarî dewam bikero.
Parlamentera DEM Partî ya Wanî Gulcane Kaçmaz Sayyigit derheqê cezaya zîndanî ke dîyaye Hemşaredarê Bajarê Pîlî yê Wanî Abdullah Zeydanî de ajansê ma rê qisey kerd.
Gulcane Kaçmaz Sayyigit qerarê mehkeme sey qerarê sîyasîyî erjna û nê vatî: ''No qerar huqûqî nîyo. Tirkîya de hinî qet huqûq nêmend. Hukm bi talîmatê îqtîdarê sîyasîyî têgêreno.Vîjnayîşê cayî de şarê Wanî 14 qezayan de serkewtişo gird fîna dest û vera xespkerdişê mazbata xover da. Coka na ceza semedê qesasgirewtişî ameye dayene. Şarê Wanî sey tim do tim vera poltîkayanê qeyûmî xover bido û çirey peyser game meerzo.
Bado ke ceza dîyaye Zeydanî Walîtîya Wanî cade bajar de qerarê qedexeyê çalakîyan û aktîvîteyan girewt. Eşkera yeno vînayene ke no proses leteyêkê polîtîkayanê zextî yo. Kenê ke zemînê qeyûmî hazir bikerî. La bi nê zextan nêeşkenê verê ma bigîrê. Şarê Wanî senî ke cuwa ver zî vera cedhkerdişê qeyûmî cewabo xurt da, vera xespkerdişê îradeyî do têkoşînê xo bi hewayêkê qerardarî bidomno.
Verî têna vera şaredarîyanê HDP û DBPyî qeyûm ameyêne cakerdene la ma tim vatêne no caardiş do heme Tirkîya ra vila bibo. Ma Ewro vînenê ke şaredarîyê muxalîfî yenê hedefgirewtene. Eke polîtîkaya qeyûmî heme Tirkîya ra vila bena, ganî têkoşîn zî wina vila bo. Ganî seranserê Tirkîya de vera xespkerdişê îradeyî xeta têkoşînî ya dahîna rêxistinkerdî û qerardare bêro pêardene. Ganî heme hêzê demokratîkî vera polîtîkayanê zextî têkoşînê hemparî bikerê. Şarê wanî senî ke heta ewro verê zextan bêveng nêmend ewro ra tepîya zî do îradeyê xo teslîmê çewî mekerê.''
