Mehkemeya Cezaya Giran a 5ine ya Dîyarbekirî  cezaya zîndanî ya 3 serran û 9 mengan daye  Hemşaredarê Bajarê Pîlî yê Wanî Abdullah Zeydanî. Vera cezaya zîndanî ke dîyaye Hemşaredarê  Wanî Abdullah Zeydanî nêrazîbîyayîşî zêdîyenê.

Badê qerarî verê Şaredarîya Wanî de çalakîya protestoyî ameye kerdene. Hemşaredarî Abdullah Zeydan û Neslîhane Şedal zî tewrê ci bîyî.

Hemşaredara Wanî Neslîhane Şedal badê qerarî, kombîyayîşê meclîsê şaredarî de vat: ''Ma do xover bidê. Ma do şaredarî bêwayîr meverdê.''

Hemserekê DEM Partî yê Wanî Veysî Dilekçîyî vat: ''AKP çîyo ke bi vîjnayîşî nêeşkena bifîno dest, bi qeyûmî xesp kena, dest nana ser. Şaredarîya Wanî ya şarî ya û ma do destûr medê na bêhuqûqîye.''

Wekîlê DEM Partî yê Wanî Zulkuf Uçarî zî wina vat: ''Ewro reyna yew qerarê qeyûmî ame dayene. Bi talîmatî ceza dîyaye Hemşaredarê Wanî. No qerar bi talîmatî ame girewtene. Hukm bi temamî kewto destê îqtîdarî. Hinî ma nêeşkenê qala huqûqî bikerê. No şar seserrî yo xover dano û do xover bido.  Şar do wayîrê îradeyê xo bivejo.''

Platformê Kede û Demokrasîyî yê Wanî zî verê Şaredarîya Bajarê Pîlî yê Wanî de eşekrayîya çapemenîye daye. Eşkerayîye de ame vatene ke na ceza semedê xespkerdişê îradeyê şarê Wanî ameye dayene. Ê ke bi rayîranê demokratîkan nêeşkenî vera şarê Wanî ser bikewê, kenê ke îradeyê ci xesp bikerê.